উত্তৰ প্ৰদেশৰ হাথৰছৰ পৰা আহিছে এক চাঞ্চল্যকৰ খবৰ। ছাত্ৰীৰ সৈতে যৌন নিৰ্যাতন চলোৱাৰ গুৰুতৰ অভিযোগত এজন অধ্যাপকৰ বিৰুদ্ধে ৰুজু কৰা হৈছে এজাহাৰ। কেৱল এয়াই নহয় অধ্যাপকগৰাকীক ইতিমধ্যে নিলম্বন কৰা হৈছে বুলিও এগৰাকী শীৰ্ষ বিষয়াই জানিব দিয়ে।
চক্ৰ বিষয়া যোগেন্দ্ৰ কৃষ্ণ নাৰায়ণে জানিব দিয়ে যে, হাথৰছৰ ছেঠ ফুল চন্দ বাগলা পিজি কলেজৰ ভূগোল বিজ্ঞানৰ মুৰব্বী অধ্যাপক ৰজনীশৰ বিৰুদ্ধে কোনো অজ্ঞাত লোকে অভিযোগ দাখিল কৰাৰ পিছতে ১৩ মাৰ্চত আৰক্ষীয়ে তেওঁৰ বিৰুদ্ধে এজাহাৰ দাখিল কৰিছিল। এজাহাৰত উল্লেখ আছে যে অধ্যাপকজনে কেইবাগৰাকীও ছাত্ৰীৰ সৈতে অপকৰ্মত লিপ্ত হৈছিল।
অধ্যাপক গৰাকীৰ বিৰুদ্ধে ভাৰতীয় ন্যায় সংহিতাৰ ৬৪ (২), ৬৮ আৰু ৭৫ ধাৰাৰ অধীনত ৰুজু হৈছে গোচৰ। বিষয়াগৰাকীয়ে জনোৱা মতে, এই ঘটনাৰ বিস্তৃত তদন্ত আৰম্ভ হোৱাৰ লগতে অজ্ঞাত এজাহাৰকাৰীৰ পৰিচয় উদ্ধাৰৰ বাবেও অভিযান চলাই থকা হৈছে।
ইফালে হাথৰছৰ ছেঠ ফুল চন্দ বাগলা পিজি কলেজৰ সচিব প্ৰদীপ কুমাৰ বাগলাই এজাহাৰৰ কথা জানিব পাৰি অধ্যাপক ৰজনীশক তাৎক্ষণিকভাৱে নিলম্বন কৰে। আনহাতে অভিযুক্ত অধ্যাপকগৰাকীয়ে এই সন্দৰ্ভত কয় যে, বিগত ১৮ বছৰ ধৰি এইধৰণৰ অভিযোগ উত্থাপন হৈ আহিছে আৰু বিভিন্ন সময়্ত তদন্তও হৈছে।
বিগত সপ্তাহত অভিযোগকাৰীয়ে মহিলা আয়োগ আৰু আন আন বিভাগীয় বিষয়াসকলক লিখা পত্ৰত স্পষ্টভাৱে কয় যে অধ্যাপকগৰাকীয়ে ছাত্ৰীসকলৰ সৈতে কুকৰ্ম কৰে আৰু সেইবোৰ তেওঁ মোবাইলেৰে ভিডিঅ’ বনাই। তদুপৰি অভিযোগকাৰীয়ে তেওঁৰ বিৰুদ্ধে অভিযোগ দাখিল কৰাৰ পিছতো কোনো ব্যৱস্থা গ্ৰহণ নকৰাৰো অভিযোগ তোলে।
পত্ৰখনত অভিযোগকাৰীয়ে কয়, ‘(নৰেন্দ্ৰ) মোদী চৰকাৰে ‘বেটী বচাও বেটী পঢ়াও’ৰ সমৰ্থন কৰাৰ পিছতো এনেধৰণৰ ব্যক্তিয়ে ছোৱালীসকলৰ লগত কুকৰ্ম কৰে। মই এই পাষণ্ড ব্যক্তিজনৰ পৰা ইমানেই বিৰক্ত হৈছো যে কেতিয়াবা কেতিয়াবা আত্মহত্যা কৰাৰ কথাও মনলৈ আহে।’
তেওঁ কয়, ‘অনুগ্ৰহ কৰি ছাত্ৰীসকলক বচাওক… লাজৰ কথা ভাবি কোনো ছাত্ৰীয়ে একো কথা নক’ব। সেয়ে অনুগ্ৰহ কৰি এই ৰাক্ষসজনৰ বিৰুদ্ধে কঠোৰতকৈ কঠোৰ ব্যৱস্থা গ্ৰহণ কৰি মোৰ দৰে আন ছোৱালীসকলকো ন্যায় দিয়ক।’
অভিযোগ অনুসৰি, অধ্যাপকগৰাকীয়ে বিগত ২০ বছৰ ধৰি ছাত্ৰীসকলক যৌন নিৰ্যাতন চলাই আহিছিল। ছাত্ৰীসকলৰ সৈতে অপকৰ্মৰ ভিডিঅ’ বনাই ব্লেকমেইল কৰাৰো অভিযোগ আছে অধ্যাপকগৰাকীৰ বিৰুদ্ধে।
আৰক্ষীয়ে কয় যে অভিযোগকাৰীয়ে কেইখনমান ফটোও প্ৰেৰণ কৰিছে, য’ত অধ্যাপকগৰাকীক অশ্লীল ৰূপত দেখা যায়। যুৱতীৰ সৈতে অধ্যাপকগৰাকীয়ে নিৰ্মাণ কৰা অশ্লীল ভিডিঅ’ সম্প্ৰতি ছ’চিয়েল মিডিয়াত ভাইৰেল হৈ আছে।
ইফালে ঘটনা সন্দৰ্ভত চাৰিজনীয়া এখন তদন্ত সমিতি গঠন কৰা হৈছে। এই কমিটিত এছ ডি এম সদৰ নীৰজ শৰ্মাক অধ্যক্ষ, চি অ’ যোগেন্দ্ৰ কৃষ্ণ নাৰায়ণ, তহচিলদাৰ চন্দ্ৰ প্ৰকাশ সিং আৰু বি এছ এ স্বতী ভাৰতীক সদস্য কৰা হৈছে।
তদন্ত সম্পূর্ণ কৰি সাত দিনৰ ভিতৰত প্রতিবেদন দাখিল কৰিবলৈ নিৰ্দেশ দিয়া হৈছে। এই সন্দৰ্ভত কমিটীয়ে তদন্ত আৰম্ভ কৰিছে। সোমবাৰে অভিযুক্ত অধ্যাপকগৰাকীলৈ জাননী জাৰি কৰা হৈছে।
আনহাতে সোমবাৰে হাথৰাছ গেট আৰক্ষীও মহাবিদ্যালয়ত উপস্থিত হৈ মহাবিদ্যালয়খনৰ অধ্যক্ষ, কৰ্মচাৰী আৰু শিক্ষক-শিক্ষয়িত্ৰীক জেৰা কৰে। আৰক্ষীয়ে ভিডিঅ’ নিৰ্মাণ কৰা কোঠাটোত সোমাই মেপ বনাই তাৰ পিছত বন্ধ কৰি দিয়ে।
উল্লেখ্য যে, ভূগোল বিভাগৰ মুৰব্বী অধ্যাপক ড০ ৰজনীশে নম্বৰ বঢ়াই দিয়া, চৰকাৰী চাকৰি প্ৰদানৰ প্ৰলোভন দি দীৰ্ঘদিনৰ পৰা ছাত্ৰীসকলক যৌন নিৰ্যাতন চলোৱাৰ অভিযোগ উত্থাপন হৈছে। ইতিমধ্যে অধ্যাপকগৰাকীয়ে সংঘটিত কৰা কু-কাণ্ডৰ ৫৯টা ভিডিঅ’ আৰু ফটো প্ৰকাশ পাইছে। শিক্ষকৰ দৰে পৱিত্ৰ বৃ্ত্তিত নিয়োজিত এগৰাকী অধ্যাপকৰ এই কু-কাণ্ডক লৈ এতিয়া তীব্ৰ চাঞ্চল্যৰ সৃষ্টি কৰিছে সমগ্ৰ দেশতে।
