বৰ্তমান সময়ত স্বামী-স্ত্ৰীৰ মাজত বুজাবুজিৰ অভাৱ, সামান্য কথাতেই হোৱা মনোমালিন্যৰ বাবে সমাজত বিবাহ বিচ্ছেদৰ ঘটনা যথেষ্ট বৃদ্ধি পাইছে।
শেহতীয়াকৈ ক্ৰিকেটাৰ যুজবেন্দ্ৰ চাহাল আৰু ধনশ্ৰী ভাৰ্মাৰ বিবাহ বিচ্ছেদ ঘটিছে। দুয়োজনেই বৃহস্পতিবাৰে বান্দ্ৰা পৰিয়াল আদালতত উপস্থিত হৈ দণ্ডাধীশৰ সন্মুখত হাজিৰ হয়।
বিবাহ বিচ্ছেদৰ চৰ্ত অনুসৰি, চাহালে নিজৰ কৰিঅ’গ্ৰাফাৰ পত্নী ধনশ্ৰী ভাৰ্মাক ৪ কোটি ৭৫ লাখ টকাৰ পাৰিতোষিক দিবলৈ সন্মত হৈছে। চাহালে এই পৰ্যন্ত ২ কোটি ৩৭ লাখ ৫৫ হাজাৰ টকা আগবঢ়াইছে। বাকী থকা ধনখিনিও সোনকালেই দিব লাগিব চাহালে।
দেশত এনে বহু বিবাহ বিচ্ছেদৰ ঘটনা সংঘটিত হৈছে, য’ত পত্নীক জীৱিকা হিচাপে বৃহৎ পৰিমাণৰ ধন দিয়া হয়। এনে পৰিস্থিতিত বিবাহ বিচ্ছেদৰ ক্ষেত্ৰত কেনেকৈ পাৰিতোষিকৰ সিদ্ধান্ত লোৱা হয় সেয়াহে এতিয়া প্ৰশ্ন হৈ উঠিছে।
উচ্চতম ন্যায়ালয়ৰ অধিবক্তা আশীষ পাণ্ডেই কয় যে, ভাৰতীয় আইনত বিবাহ বিচ্ছেদৰ ক্ষেত্ৰত জীৱিকাৰ ধন দিয়াৰ কোনো নিৰ্দিষ্ট সূত্ৰ নাই। জীৱিকাৰ ধন নিৰ্ণয় কৰাৰ সময়ত বহু কথা বিবেচনা কৰা হয়, যাৰ ভিত্তিত আদালতে এটা পৰিমাণৰ সিদ্ধান্ত লয়। জীৱিকাৰ সিদ্ধান্ত লোৱাৰ সময়ত স্বামী-স্ত্ৰীৰ আৰ্থিক অৱস্থা, তেওঁলোকৰ উপাৰ্জন ক্ষমতা আদি কেইবাটাও কাৰকৰ প্ৰতি লক্ষ্য ৰখা হয়।
উদাহৰণস্বৰূপে, যদি এগৰাকী মহিলাই ১০ বছৰ ধৰি গৃহিণী হৈ আছে আৰু তেওঁৰ স্বামীৰ সৈতে বিবাহ বিচ্ছেদ হয়, তেন্তে আদালতে স্বামীৰ আয়ৰ কথা বিবেচনা কৰিহে পত্নীক দিবলগীয়া ধনৰাশি নিৰ্ণয় কৰে।
ইয়াৰ উপৰি, যদি স্বামী-স্ত্ৰী দুয়োজনেই চাকৰিৰ পৰা মাহে ৫০ হাজাৰকৈ উপাৰ্জন কৰে, তেনে অৱস্থাত আদালতে ৰক্ষণাবেক্ষণৰ ভাট্টা দিয়াৰ নিৰ্দেশ দিয়াটো প্ৰয়োজনীয় নহয়। ইয়াৰ কাৰণ হল দুয়োৰে আৰ্থিক অৱস্থা একে। যদি সন্তানৰ যত্নত পত্নী বা স্বামীৰ কোনো এজনৰ ওপৰত আৰ্থিক বোজা বেছি হয়, তেন্তে আদালতে আৰ্থিক সহায়ৰ নিৰ্দেশ দিব পাৰে।
ইফালে বিবাহ বিচ্ছেদৰ বেছিভাগ ক্ষেত্ৰতে পত্নীয়ে আৰ্থিক সাহায্য লাভ কৰে, যদিও ভাৰতীয় আইনত পুৰুষকো পাৰিতোষিক বিচৰাৰ অধিকাৰ দিয়া হয়। ১৯৫৫ চনৰ হিন্দু বিবাহ আইনৰ ২৪ আৰু ২৫ নং ধাৰাত স্বামীয়ে পাৰিতোষিকৰ দাবী কৰিব পাৰে। অৱশ্যে কিছুমান বিশেষ পৰিস্থিতিতহে স্বামীয়ে পাৰিতোষিকৰ ধন লাভ কৰে। ইয়াৰ বাবে স্বামীয়ে কোনো নিৰ্দিষ্ট কাৰণত পত্নীৰ ওপৰত আৰ্থিকভাৱে নিৰ্ভৰশীল আছিল বুলি প্ৰমাণ কৰিব লাগিব। উদাহৰণস্বৰূপে, তেওঁ কোনো অক্ষমতা বা কোনো অৱস্থাত ভুগি আছিল যাৰ বাবে তেওঁ উপাৰ্জন কৰিব পৰা নাছিল।
