উত্তৰ প্ৰদেশৰ চাহাৰনপুৰত এজন পিতৃয়ে নিজৰ তিনি সন্তান আৰু পত্নীক নৃশংসভাৱে গুলী চলোৱাৰ ঘটনা পোহৰলৈ আহিছে। এই হৃদয় বিদাৰক ঘটনাত তিনিওটা সন্তানৰ মৃত্যু হোৱাৰ লগতে পত্নী গুৰুতৰভাৱে আহত হয়।
ঘটনা সন্দৰ্ভত তথ্য লাভ কৰাৰ পিছতে ঘটনাস্থলত আৰক্ষীৰ লগতে শীৰ্ষ বিষয়াসকল উপস্থিত হৈ ঘটনাস্থলীৰ পৰাই আৰক্ষীয়ে গ্ৰেপ্তাৰ কৰিছে হত্যাকাৰী পিতৃক। ঘটনাস্থলীত আৰক্ষী আৰু ফৰেনছিক দলে তীক্ষ্ণ তদন্ত অব্যাহত ৰাখিছে।
জানিব পৰা অনুসৰি, এই নৃশংস কাণ্ড কৰা লোকজন এগৰাকী বিজেপি নেতা আৰু তেওঁ দলৰ জিলা কাৰ্যবাহী সদস্য।
তথ্য অনুসৰি এই ঘটনা সংঘটিত হৈছে থানা গংগোহ অঞ্চলৰ সাংগাঠেডা গাঁৱত, য’ত শনিবাৰে বিয়লি বিজেপি নেতা যোগেশ ৰোহিলাই পত্নী নেহা আৰু তিনিটা সন্তান ক্ৰমে ১১ বছৰীয়া কন্যা শ্ৰদ্ধা, ৬ বছৰীয়া পুত্ৰ শিৱাংশ আৰু ৪ বছৰীয়া পুত্ৰ দেৱংশৰ মূৰত গুলীচালনা কৰে।
গুলী আৰু চিঞৰ-বাখৰৰ শব্দৰ বাবেই গাঁওখনত এক চাঞ্চল্যকৰ পৰিৱেশে বিৰাজ কৰে। তথ্য পোৱাৰ লগে লগে গংগোহ আৰক্ষী থানা সেই স্থানত উপস্থিত হয়। ঘটনাস্থলীৰ পৰাই অস্ত্ৰসহ অভিযুক্ত পিতৃক গ্ৰেপ্তাৰ কৰে আৰক্ষীয়ে।
অভিযুক্ত হত্যাকাৰী লোকজনে আৰক্ষীৰ আগত দিয়া মন্তব্য অনুসৰি পত্নীৰ চৰিত্ৰত সন্দেহ ওপজাৰ বাবেই এই নৃশংস ঘটনা সংঘটিত কৰে।
