বলীউডৰ অভিনেতা সুশান্ত সিং ৰাজপুতৰ মৃত্যু সন্দৰ্ভত চিবিআইয়ে মুম্বাইৰ আদালতত দাখিল কৰিছে চূড়ান্ত প্ৰতিবেদন। এই গোচৰটো বন্ধ কৰিবলৈও চিবিআইয়ে অনুৰোধ জনাইছে। উল্লেখ্য যে, ২০২০ চনত সন্দেহজনক পৰিস্থিতিত মৃত্যু হৈছিল অভিনেতাজনৰ। অভিনেতাজনৰ মৃতদেহ উদ্ধাৰ হৈছিল মুম্বাইৰ ফ্লেটৰ পৰা।
এই ঘটনাৰ পিছতে দেশজুৰি তীব্ৰ প্ৰতিক্ৰিয়া হোৱাৰ লগতে পৰিয়ালৰ লোকৰ দাবীৰ ভিত্তিত চৰকাৰে গোচৰৰ তদন্ত চিবিআইক অৰ্পণ কৰিছিল।
সূত্ৰ অনুসৰি অভিনেতাজনৰ মৃত্যুৰ গোচৰত চিবিআইয়ে কোনো গুৰুত্বপূৰ্ণ শুং-সূত্ৰ বিচাৰি পোৱা নাছিল, সেয়ে গোচৰটো বন্ধ কৰিবলৈ আদালতৰ কাষ চাপিছিল। এই ঘটনা পোহৰলৈ অহাৰ সময়ত পৰিয়ালৰ লোকে মৃত্যুক লৈ বহু প্ৰশ্ন উত্থাপন কৰিছিল। পৰিয়ালৰ লোকে অভিযোগ কৰিছিল যে সুশান্তই আত্মহত্যা কৰা নাই, ইয়াৰ আঁৰত আছিল ষড়যন্ত্ৰ।
খবৰ আৰু সূত্ৰ অনুসৰি চিবিআইয়ে নিজৰ তদন্তত অভিনেতাজনৰ প্ৰেমিকা ৰিয়া চক্ৰৱৰ্তী আৰু তেওঁৰ পৰিয়ালকো ক্লিন চিট প্ৰদান কৰা হৈছে। সূত্ৰ অনুসৰি চিবিআইয়ে সুশান্তক কোনোবাই জোৰ কৰি আত্মহত্যা কৰাৰ কোনো প্ৰমাণ লাভ নকৰিলে।
চিবিআইৰ এই চূড়ান্ত প্ৰতিবেদনৰ পিছত আদালতে কি সিদ্ধান্ত গ্ৰহণ কৰে সেয়া সময়ত লক্ষ্যণীয় হ’ব।
