পবিত্ৰ ৰমজান মাহ উপলক্ষে আবুধাবিস্থিত BAPS হিন্দু মন্দিৰৰ উদ্যোগত আন্তঃসাংস্কৃতিক কাৰ্যসূচী অনুষ্ঠিত হয়। চলিত সপ্তাহৰ আৰম্ভণিতে অনুষ্ঠিত হোৱা ওমছিয়াত নামৰ এই অনুষ্ঠানত দেশখনৰ মন্ত্ৰী শ্বেইখ নাহিয়ান বিন মুবাৰক আল নাহিয়ানৰ লগতে কেইবাজনো ৰাজনীতিবিদ আৰু ৰাষ্ট্ৰদূত উপস্থিত থাকে।
এই উপলক্ষে ইউএই আৰু অন্যান্য ঠাইৰ পৰা প্ৰায় ২০০ জন ধৰ্মগুৰু, চৰকাৰী বিষয়া, কূটনীতিবিদ আৰু আন আন প্ৰতিনিধি সমবেত হয়। বিশ্বব্যাপী সমন্বয়ক প্ৰসাৰিত কৰি এই মন্দিৰটোৱে ৰমজান মাহত বিশ্বাস, বন্ধুত্ব, ঐক্য আৰু চিন্তা-চৰ্চাৰ মূল্যবোধক প্ৰতিফলিত কৰিছে।
সন্ধিয়া মন্দিৰৰ প্ৰধান পুৰোহিত পূজ্য ব্ৰহ্মবিহাৰিদাস স্বামীৰ নেতৃত্বত সাংস্কৃতিক অনুষ্ঠান, হৃদয়স্পৰ্শী ভাষণ আৰু পূজা অনুষ্ঠিত কৰা হয়। সন্ধিয়াৰ পৰা আৰম্ভ হোৱা এই কাৰ্যসূচী, ৰাতিপুৱা ছেহৰীৰ সৈতে অন্ত পৰে। ছেহেৰীত লোকসকলক নিৰামিষ খাদ্য প্ৰদান কৰা হৈছিল।
উল্লেখ্য যে, ২০২৪ বৰ্ষৰ ১৪ ফেব্ৰুৱাৰীত এই মন্দিৰটো উদ্বোধন কৰিছিল প্ৰধানমন্ত্ৰী নৰেন্দ্ৰ মোদীয়ে। এই মন্দিৰৰ ৰক্ষণাবেক্ষণ বোচাসনৱাসী অক্ষৰ পুৰুষোত্তম স্বামীনাৰায়ণ সংস্থা বা বি এ পি এছ ছ’চাইটিয়ে কৰে।
