২২ মাৰ্চৰ পৰা আৰম্ভ হোৱা আই পি এলৰ ১৮ সংখ্যক ছিজনৰ প্ৰথমখন মেচত সুন্দৰ প্ৰদৰ্শন আগবঢ়াই বিজয়ী হয় ৰয়েল চেলেঞ্জাৰ্ছ বাংগালুৰু। ২২টা বল বাকী থাকোতেই ৰয়েল চেলেঞ্জাৰ্ছ বাংগালুৰুৱে কলকাতা নাইট ৰাইডাৰ্ছক ৭ উইকেটত পৰাস্ত কৰে।
ৰয়েল চেলেঞ্জাৰ্ছ বাংগালুৰুৰ এই চমকপ্ৰদ প্ৰদৰ্শনৰ পিছতে দলটোৰ প্ৰাক্তন স্বত্তাধিকাৰী বিজয় মালিয়াই ছ’চিয়েল মিডিয়াযোগে কৰা এটা প’ষ্ট ব্যাপক ৰূপত ভাইৰেল হ’বলৈ ধৰিছে।
বিত্তীয় কেলেংকাৰী সংঘটিত কৰি ভাৰত ত্যাগ কৰা বিজয় মালিয়াই ছ’চিয়েল মিডিয়া প্লেটফৰ্ম এক্সৰ জৰিয়তে এটা প’ষ্ট শ্বেয়াৰ কৰি আৰ চি বিক ধন্যবাদ জ্ঞাপন কৰে। তেওঁ টুইটটোত লিখিছে, ‘কলকাতা নাইট ৰাইডাৰ্ছৰ বিৰুদ্ধে চমকপ্ৰদ জয়ৰ বাবে আৰ চি বিলৈ অভিনন্দন। শুনি ভাল লাগিল যে অৱশেষত ধাৰাভাষ্যকাৰসকলে কৈছে যে আৰ চি বিয়ে ভাল বলিং কৰিছিল।’
আই পি এলৰ ২০০৮ চনৰ পৰা ৮টা ছিজনলৈকে ৰয়েল চেলেঞ্জাৰছ বেংগালুৰু (আৰ চি বি)ৰ ফ্ৰেঞ্চাইজিৰ মালিক বিজয় মালিয়াই আৰ্থিক অপৰাধৰ বাবে ইউনাইটেড কিংডমত বসবাস কৰি আছে। ইফালে প্ৰায় এটা দশক ধৰি ভাৰত চৰকাৰে তেওঁক নিজ দেশলৈ ঘূৰাই আনিবলৈ চেষ্টা চলাই আহিছে।
উল্লেখ্য যে, বিজয় মালিয়াৰ বিৰুদ্ধে ভাৰতীয় ষ্টেট বেংককে ধৰি এক ডজনৰো অধিক ভাৰতীয় বেংকৰ পৰা ৯ হাজাৰ কোটিৰো অধিক মূল্যৰ ঋণ পৰিশোধ নকৰাৰ অভিযোগ আছে। ২০১৬ চনত দেশ এৰাৰ পূৰ্বে বিজয় মালিয়া সংসদৰ সদস্যও আছিল।
