সোমবাৰে ঢাকা প্ৰিমিয়াৰ ডিভিজন ক্ৰিকেট লীগৰ খেলৰ সময়ত বাংলাদেশৰ প্ৰাক্তন অধিনায়ক তামিম ইকবালে হাৰ্ট এটেকত আক্ৰান্ত হয়। ইয়াৰ পিছতে তেওঁৰ এঞ্জিওপ্লাষ্টি কৰা হয়।
খবৰ অনুসৰি মাত্ৰ এটা অভাৰ ফিল্ডিং কৰাৰ পিছতেই তেওঁৰ স্বাস্থ্যৰ অৱনতি ঘটে। লগে লগে ওচৰৰ চিকিৎসালয়লৈ লৈ যোৱা হয়। তাতেই তামিম ইকবালৰ অস্ত্ৰোপচাৰ কৰা হয়।
ইতিমধ্য তেওঁৰ ভিডিঅ’ ছ’চিয়েল মিডিয়াত ভাইৰেল হৈ পৰিছে। কেৱল এয়াই নহয়, ভাৰতৰ প্ৰাক্তন ক্ৰিকেটাৰ যুৱৰাজ সিঙেও তামিমৰ বাবে প্ৰাৰ্থনা কৰিছে। তেওঁ ইনষ্টাগ্ৰামত এটা পোষ্টৰ জৰিয়তে তেওঁৰ আশু-আৰোগ্য কামনা কৰে।
হাৰ্ট এটেকত আক্ৰান্ত হোৱা তামিম ইকবালক হেলিকপ্টাৰেৰে চিকিৎসালয়লৈ নিয়াৰ প্ৰচেষ্টা চলোৱা হৈছিল যদিও সাৱৰৰ বিকেএছপি খেলপথাৰৰ পৰা বিমানেৰে লৈ যাব পৰা নাছিল। পিছত তেওঁক ফাজিলাটুনেছা হাস্পতাললৈ লৈ যোৱা হয়।
ইফালে চিকিৎসকে জানিবলৈ দিয়ে যে, ইয়াক হাৰ্ট এটেক বুলিয়েই ক’ব পাৰি। তেওঁলোকে এঞ্জিঅ’গ্ৰাফী আৰু এঞ্জিওপ্লাষ্টি কৰি ব্লকটো আঁতৰাই পেলায়।
