ক্ৰিকেট আৰু মেচ ফিক্সিং, এই দুটা শব্দৰ সম্পৰ্ক বহু পুৰণি। এসময়ত ক্ৰিকেটক কলংকিত কৰা মেচ ফিক্সিঙৰ আন এক ঘটনা পোহৰলৈ আহিছে। ঘটনাটো পুৰণি যদিও এই সন্দৰ্ভত আহিছে এটা ডাঙৰ আপডেট।
যোৱা বছৰ শ্ৰীলংকাত অনুষ্ঠিত হোৱা লিজেণ্ডছ ক্ৰিকেট লীগত কিছু খেলিমেলিৰ সৃষ্টি হৈছিল। এই সন্দৰ্ভত এতিয়া খবৰ আহিছে যে শ্ৰীলংকাৰ এখন আদালতে ২০২৪ চনত এখন ক্ৰিকেট মেচ ফিক্সিং কৰাৰ অভিযোগত মঙলবাৰে এজন ভাৰতীয় নাগৰিকক চাৰি বছৰৰ কঠোৰ শাস্তি প্ৰদান কৰে।
এটা আগশাৰীৰ নিউজ এজেন্সিৰ খবৰ অনুসৰি, মেচ ফিক্সিঙৰ অভিযোগত যোগী পেটেল নামৰ এজন ভাৰতীয় লোকক শ্ৰীলংকাৰ এখন আদালতে চাৰি বছৰৰ শাস্তি প্ৰদান কৰিছে। তেওঁৰ বিৰুদ্ধে শ্ৰীলংকাৰ কেণ্ডীত খেলা লিজেণ্ডছ ক্ৰিকেট লীগৰ এখন মেচ ফিক্সিং কৰিবলৈ প্ৰস্তাব দিয়াৰ অভিযোগ উত্থাপন হৈছিল।
শ্ৰীলংকা ক্ৰিকেটৰ নিৰ্বাচন সমিতিৰ অধ্যক্ষ উপুল থাৰাংগাৰ অভিযোগৰ ভিত্তিত তেওঁৰ বিৰুদ্ধে এই গোচৰ ৰুজু কৰা হৈছিল।
উল্লেখ্য যে, যাতায়ত নিষেধাজ্ঞা আৰোপ কৰাৰ পিছতো দেশ এৰি পলায়ন কৰা পেটেলৰ অনুপস্থিতিতেই আদালতত চলিছিল বিচাৰ। ইয়াৰ পিছত যোৱা বছৰৰ মাৰ্চ মাহত তেওঁক গ্ৰেপ্তাৰ কৰা হয় আৰু পিছত মে’ মাহত কঠোৰ চৰ্তত জামিনত মুকলি কৰি দিয়া হৈছিল।
শ্ৰীলংকাত মেচ ফিক্সিঙৰ সৈতে জড়িত আইনসমূহ অতি কঠোৰ
শ্ৰীলংকাত মেচ ফিক্সিং সন্দৰ্ভত কঠোৰ আইন আছে। শ্ৰীলংকাৰ আইনত মেচ ফিক্সিং অপৰাধমূলক আইনৰ অধীনত ৰখা হয়। শ্ৰীলংকাত যদি কোনো ব্যক্তিক মেচ ফিক্সিঙৰ দোষী সাব্যস্ত হয় তেন্তে তেওঁক ১০ বছৰৰ কাৰাদণ্ড বা জৰিমনা বিহা হ’ব পাৰে।
অৱশ্যে শ্ৰীলংকা ক্ৰিকেট ব’ৰ্ড বা আইচিচিৰ সৈতে লিজেণ্ডছ ক্ৰিকেট লীগৰ কোনো আনুষ্ঠানিক সম্পৰ্ক নাই। কিন্তু ভাৰতকে ধৰি বহু দেশৰ ডাঙৰ ডাঙৰ খেলুৱৈয়ে এই লীগত খেলে। শ্ৰীলংকাই ২০১৯ চনত ক্ৰীড়া দুৰ্নীতি প্ৰতিৰোধ আইন গ্ৰহণ কৰিছিল, য’ত ১০ বছৰ পৰ্যন্ত কাৰাদণ্ড আৰু ৫ লাখ ৫০ হাজাৰ মাৰ্কিন ডলাৰ পৰ্যন্ত জৰিমনা বিহাৰ ব্যৱস্থা আছে।
