আৰম্ভ হ’ল বিহাৰ বিধানসভা নিৰ্বাচনৰ ৰণডংকা। দুদিনীয়া ভ্ৰমণসূচীৰে বিহাৰলৈ যোৱা দেশৰ গৃহমন্ত্ৰী অমিত শ্বাহে আজি গোপালগঞ্জত এখন বিশাল ৰেলীৰে নিৰ্বাচনী প্ৰচাৰ আৰম্ভ কৰে। এই ৰেলীত বিজেপিৰ লগতে তেওঁলোকৰ সহযোগী দলসমূহৰ শীৰ্ষ নেতাসকলো উপস্থিত থাকে।
আজিৰ এই সভাতেই বিহাৰৰ জনসাধাৰণৰ মন জয় কৰাৰ উদ্দেশ্যে মা সীতাৰ মন্দিৰ নিৰ্মাণ কৰিব বুলিও ঘোষণা কৰে।
ৰাইজক সম্বোধন কৰি অমিত শ্বাহে বিহাৰৰ বিৰোধী দলসমূহক লক্ষ্য কৰি লয়। আৰজেডি আৰু কংগ্ৰেছে বিহাৰৰ উন্নয়নৰ বাবে একো নকৰাৰ অভিযোগ উত্থাপন কৰে।
ভাষণত তেওঁ কয়, ‘লালু যাদৱ যেতিয়া কেন্দ্ৰীয় চৰকাৰত মন্ত্ৰী আছিল, তেতিয়া তেওঁ বিহাৰক কি দিছিল? ইয়াৰ হিচাপ তেওঁলোকে দিব লাগে। লালু যাদৱেও বিহাৰৰ বাবে একো নকৰিলে, ছোনিয়া গান্ধী আৰু মনমোহন সিঙেও ইয়াৰ উন্নয়নত একো অৰিহণা যোগোৱা নাছিল।’
অমিত শ্বাহে কয়, ‘মোৰ অতিকৈ প্ৰিয় ডেকা বন্ধু-বান্ধৱীসকল ৰাম ৰাম আৰু প্ৰণাম। গোপালগঞ্জৰ এই ভূমিয়ে সদায়েই দেশক নতুন পথ দেখুৱাবলৈ চেষ্টা কৰি আহিছে। ৰাম মন্দিৰ নিৰ্মাণৰ ক্ষেত্ৰত লালু এণ্ড কোম্পানীয়ে বাধাৰ সৃষ্টি কৰিছিল। কিন্তু আপোনালোকক কওঁ যে এতিয়া এই বিহাৰৰ ভূমিত মাতৃ সীতাৰ মন্দিৰ প্ৰতিষ্ঠা হ’ব।’
কেন্দ্ৰীয় গৃহমন্ত্ৰী শ্বাহে লগতে দেশৰ জনসাধাৰণক পুনৰবাৰ NDAক ভোট দিবলৈ আহ্বান জনাই আগন্তুক সময়ত বিহাৰক বানমুক্ত কৰাৰো প্ৰতিশ্ৰুতি প্ৰদান কৰে।
