অনিশ্চয়তাৰ খেল ক্ৰিকেটক লৈ সময়ে সময়ে সৃষ্টি হয় নতুন বিবাদৰ। কেতিয়াবা যদি মেচ ফিক্সিং, আন কেতিয়াবা ক্ৰিকেট ফিল্ডত হোৱা অনাকাংক্ষিত ঘটনাৰ বাবে চৰ্চাত থাকে ক্ৰিকেট। শেহতীয়াকৈ নিচাজাতীয় সামগ্ৰীৰ সৈতে এখন দেশৰ ৰাষ্ট্ৰীয় অধিনায়ক ধৰা পৰা ঘটনাই পুনৰ এবাৰ বাতৰিৰ শিৰোণাম দখল কৰিছে। এই খেলুৱৈগৰাকীৰ নাম হৈছে নিকোলাছ কিৰ্টন।
নিকোলাছ কিৰ্টন কামাডা ৰাষ্ট্ৰীয় দলৰ অধিনায়ক। জামাইকা দেশৰ এটা বিখ্যাত মিডিয়া চেনেলৰ তথ্য অনুসৰি যোৱা দেওবাৰে নিকোলাছ কিৰ্টনক গ্ৰেপ্তাৰ কৰিছে। এই ঘটনা সন্দৰ্ভত শেহতীয়াকৈ কানাডা ক্ৰিকেট ব’ৰ্ডেও আনুষ্ঠানিক বিবৃতি প্ৰকাশ কৰিছে।
কানাডা ক্ৰিকেট ব’ৰ্ডে বিবৃতিটোত কয়, ‘নিকোলাছ কিৰ্টনৰ বিৰুদ্ধে উত্থাপিত হোৱা অভিযোগ আৰু তেওঁক গ্ৰেপ্তাৰ কৰা কাৰ্য সবিশেষ কানাডা ক্ৰিকেট ব’ৰ্ডে লাভ কৰিছে। আমি এই বিষয়টো অতি গুৰুত্ব সহকাৰে গ্ৰহণ কৰি অধিক পদক্ষেপৰ ওপৰত অহৰহ নিৰীক্ষণ কৰি আছো।
একাংশ সংবাদ মাধ্যমৰ প্ৰতিবেদন অনুসৰি ৯ কেজি ভাঙৰ সৈতে ধৰা পৰিছে নিকোলাছ কিৰ্টন। ভাং, যাক গাঞ্জা বুলিও কোৱা হয়। সেই দেশৰ আইন অনুসৰি গাঞ্জা লৈ যাত্ৰা কৰাটো কোনো অপৰাধ নহয় আৰু এজন ব্যক্তিয়ে প্ৰায় ৫৭ গ্ৰাম গাঞ্জা লগত লৈ যাব পাৰে। কিন্তু ৰাজহুৱা স্থানত ড্ৰাগছৰ সৈতে যাত্ৰা আৰু সেৱন কৰিব নোৱাৰি। কিন্তু নিকোলাছ কিৰ্টনে নিৰ্ধাৰিত সীমাতকৈ ১৬০ গুণ বেছি ড্ৰাগছ লৈ ধৰা পৰিছে।
কানাডাৰ দলটোৱে বৰ্তমান ১৮ এপ্ৰিলৰ পৰা আৰম্ভ হ’বলগীয়া উত্তৰ আমেৰিকান কাপৰ বাবে প্ৰস্তুতি চলাই আছে। কিন্তু নিকোলাছ কিৰ্টনৰ বিৰুদ্ধে উত্থাপিত অভিযোগৰ পিছত উত্তৰ আমেৰিকান কাপৰ বাবে তেওঁ দলত স্থান পাব নে নাই সেয়া এক ডাঙৰ প্ৰশ্ন। এই প্ৰতিযোগিতাত অংশগ্ৰহণ কৰিব আমেৰিকা, বাৰ্মুডা, বাহামা আৰু আয়োজক কানাডাই।
উল্লেখ্য যে, বাৰ্বাডোছত জন্মগ্ৰহণ কৰা নিকোলাছ কিৰ্টন যোৱা কেইবছৰমানৰ পৰা কানাডাৰ দলৰ অন্যতম গুৰুত্বপূৰ্ণ খেলুৱৈ। কানাডাৰ দলত যোগদান কৰাৰ পূৰ্বে তেওঁ ঘৰুৱা পৰ্যায়ত বাৰ্বাডোছ দল আৰু ৱেষ্ট ইণ্ডিজৰ ১৯ বছৰ অনুৰ্ধ দলকো প্ৰতিনিধিত্ব কৰিছিল।
ইফালে সংবাদ মাধ্যমৰ বাতৰি অনুসৰি কানাডাৰ এজন ক্ৰিকেটাৰে বছৰি ৫০ লাখ টকাও উপাৰ্জন কৰিবলৈ সক্ষম নহয়। সেয়ে এইধৰণৰ নিষিদ্ধ সামগ্ৰীৰ অবৈধ বেহাত লিপ্ত হোৱা বুলি অনুমান কৰিছে একাংশ আন্তঃৰাষ্ট্ৰীয় সংবাদ মাধ্যমে।
