ৱাকফ সংশোধনী বিধেয়ক আইনত পৰিণত হোৱাৰ পিছৰে পৰা দেশত অধিক আগ্ৰাসী ৰূপত প্ৰতিবাদত নামি পৰিছে বিৰোধী ৰাজনৈতিক দলৰ লগতে মুছলমান দল-সংগঠন। ৰাজপথত হাজাৰ-হাজাৰ মুছলমান লোকে প্ৰতিবাদ সাব্যস্ত কৰাৰ লগতে এই আইনখন প্ৰত্যাহাৰ কৰাৰ বাবে এতিয়া সৰ্বোচ্চ ন্যায়ালয়ৰ কাষ চাপিছে কেইবাটাও বিৰোধী ৰাজনৈতিক দলৰ লগতে মুছলমান দল-সংগঠন।
বিভিন্ন সংগঠনৰ সমান্তৰালকৈ এইবাৰ এই আইনখনৰ বিৰোধিতা কৰি সৰ্বোচ্চ ন্যায়ালয়ৰ কাষ চাপিছে ডি এম কে। আবেদনখনত উল্লেখ কৰা হৈছে যে এই আইনখনৰ দ্বাৰা তামিলনাডুৰ প্ৰায় ৫০ লাখ মুছলমান আৰু সমগ্ৰ দেশৰ ২০ কোটি মুছলমানৰ মৌলিক অধিকাৰ খৰ্ব কৰা হৈছে।
তামিলনাডু বিধানসভাই ২৭ মাৰ্চত এক প্ৰস্তাৱ গ্ৰহণ কৰি কেন্দ্ৰক বিধেয়ক প্ৰত্যাহাৰ কৰিবলৈ আহ্বান জনাইছিল। জেপিচিৰ সদস্যসকলে উত্থাপন কৰা আপত্তি বিবেচনা নকৰাকৈয়ে বিধেয়কখন গৃহীত কৰাৰ অভিযোগ আনিছে দলটোৱে।
ইয়াৰ উপৰিও কংগ্ৰেছ সাংসদ ইমৰান প্ৰতাপগড়ীয়েও ৱাকফ সংশোধনী বিধেয়কৰ বিৰুদ্ধে উচ্চতম ন্যায়ালয়ৰ দ্বাৰস্থ হৈছে। এতিয়ালৈকে এই আইনখনৰ বিৰুদ্ধে সৰ্বোচ্চ ন্যায়ালয়ত মুঠ ১৩খন আবেদন দাখিল কৰা হৈছে।
আইনখনৰ বিৰুদ্ধে সৰ্বোচ্চ ন্যায়ালয়ৰ দ্বাৰস্থ হোৱা দল, ব্যক্তি আৰু সংগঠনসমূহ
মহম্মদ জাভেদ (কংগ্ৰেছ সাংসদ) (প্ৰথম আবেদন)
আছাদুদ্দিন ওৱেইছি (এ আই এম আই এম নেতা)
এছ’চিয়েচন ফৰ প্ৰটেকচন অৱ চিভিল ৰাইটছ (এন জি অ’)
আমানতুল্লাহ খান (আপ নেতা)
মৌলানা আৰ্ছাদ মাদানী (জমিয়ত উলেমা-ই-হিন্দ)
সমস্থ কেৰালা জমিয়াতুল উলেমা
তৈয়ব খান ছালমানী (আইনৰ ছাত্ৰ)
অঞ্জুম কাদ্ৰী (এক্টিভিষ্ট)
অল ইণ্ডিয়া মুছলিম পাৰ্ছনেল ল ব’ৰ্ড
এছ ডি পি আই
আই ইউ এম এল
এ ৰাজাৰ জৰিয়তে DMK
কংগ্ৰেছ দলৰ সাংসদ ইমৰাণ প্ৰতাপগড়ী
আনহাতে মণিপুৰৰ মুছলমান বিধায়কশ্বেখ নুৰুল হাছানেও এই আইনখনৰ বিৰুদ্ধে সৰ্বোচ্চ ন্যায়ালয়ৰ দ্বাৰস্থ হ’ব বুলি জানিবলৈ দিছে।
