বিগত বৰ্ষত বাংলাদেশত হিংসাত্মক প্ৰতিবাদৰ অন্তত শ্বেখ হাছিনাক ক্ষমতাৰ পৰা অপসাৰণ কৰা হয়, তাৰ পিছত বাংলাদেশৰ বৰ্খাস্ত প্ৰধানমন্ত্ৰী শ্বেখ হাছিনাই নিজ দেশ এৰি ভাৰতলৈ পলায়ন কৰিবলগীয়া হয়।
এই সময়ছোৱাত বাংলাদেশ চৰকাৰে কেইবাবাৰো প্ৰাক্তন প্ৰধানমন্ত্ৰী শ্বেখ হাছিনাক প্ৰত্যাৰ্পণৰ দাবী জনায়। এতিয়া আকৌ এবাৰ বাংলাদেশে প্ৰাক্তন প্ৰধানমন্ত্ৰী শ্বেখ হাছিনাৰ প্ৰত্যাৰ্পণ সন্দৰ্ভত ডাঙৰ দাবী কৰিছে।
বাংলাদেশৰ বৈদেশিক পৰিক্ৰমা উপদেষ্টা মহম্মদ তৌহিদ হুছেইনে ৮ এপ্ৰিলত কয় যে, শেহতীয়াকৈ থাইলেণ্ডৰ বেংককত প্ৰধানমন্ত্ৰী নৰেন্দ্ৰ মোদীৰ সৈতে হোৱা বৈঠকত ভাৰতত আশ্ৰয় লৈ থকা প্ৰাক্তন প্ৰধানমন্ত্ৰী শ্বেখ হাছিনাৰ প্ৰত্যাৰ্পণৰ বিষয়টো উত্থাপন কৰিছে অন্তৱৰ্তীকালীন চৰকাৰী মুৰব্বী মহম্মদ ইউনুছে।
লগতে তেওঁ কয় যে এই বিষয়টো সন্দৰ্ভত কোনো চূড়ান্ত সিদ্ধান্ত লোৱা হোৱা নাই। হুছেইনে লগতে কয় যে, দুয়োখন দেশৰ যৌথ প্ৰচেষ্টাৰ জৰিয়তেহে বাংলাদেশ আৰু ভাৰতৰ মাজৰ সম্পৰ্ক উন্নত হ’ব পাৰে।
উল্লেখযোগ্য যে, থাইলেণ্ডত অনুষ্ঠিত বিমষ্টেক সন্মিলনৰ সময়ত মুখ্য উপদেষ্টা ইউনুছ আৰু প্ৰধানমন্ত্ৰী মোদীৰ মাজত এই বৈঠক অনুষ্ঠিত হয়। এই বৈঠকৰ অন্তত ভাৰতৰ বৈদেশিক সচিব বিক্ৰম মিশ্ৰীয়ে কয় যে ভাৰত আৰু বাংলাদেশৰ পাৰস্পৰিক সম্পৰ্কৰ পৰিৱেশৰ ক্ষতি কৰিব পৰা এনে বক্তব্যৰ পৰা আঁতৰি থাকিবলৈ প্ৰধানমন্ত্ৰী মোদীয়ে সকলো পক্ষক আহ্বান জনাইছে।
বৈঠকৰ এদিন পিছতেই ইউনুছৰ প্ৰেছ সম্পাদক ছফিকুল আলমে ফেচবুক পোষ্টত লিখিছে যে ইউনুছে শ্বেখ হাছিনাৰ প্ৰত্যাৰ্পণৰ বিষয়টো পুনৰ উত্থাপন কৰিছে আৰু এইক্ষেত্ৰত ভাৰতৰ সঁহাৰি “নেতিবাচক নহয়” বুলি দাবী কৰিছে।
