ৱাকফ সংশোধনী আইনৰ বিৰুদ্ধে পশ্চিম বংগত চলি থকা প্ৰতিবাদ আৰু হিংসাত্মক পৰিস্থিতিৰ মাজতে তৃণমূল কংগ্ৰেছৰ মুৰব্বী মমতা বেনাৰ্জীয়ে ৰাজ্যখনত এই বিতৰ্কিত আইনখন বলবৎ হ’বলৈ নিদিও বুলি মন্তব্য কৰিছে।
মমতা বেনাৰ্জীয়ে কয়, ‘ৱাকফ আইন কেন্দ্ৰীয় চৰকাৰে বনাইছে। আমি বংগত ৱাকফ ৰূপায়ণ কৰিবলৈ নিদিও। আমি এই আইনখনক সমৰ্থন নকৰো।’
ইফালে মুৰ্ছিদাবাদত হোৱা হিংসাক লৈ প্ৰতিক্ৰিয়া প্ৰকাশ কৰি মমতা বেনাৰ্জীয়ে জনসাধাৰণক শান্তি বৰ্তাই ৰাখিবলৈ আহ্বান জনায়।
মুৰ্ছিদাবাদত হোৱা হিংসাত্মক প্ৰতিবাদৰ মাজতে মুখ্যমন্ত্ৰী মমতা বেনাৰ্জীয়ে শনিবাৰে সামাজিক মাধ্যম ‘এক্স’ত পোষ্ট কৰি কয়, ‘সকলো ধৰ্মৰ লোকলৈ মোৰ বিনম্ৰ আহ্বান যে অনুগ্ৰহ কৰি শান্ত, সংযত হৈ থাকক। ধৰ্মৰ নামত কোনো ধৰণৰ অধৰ্মীয় কামত লিপ্ত নহ’ব। প্ৰতিজন মানুহৰ জীৱন বহুমূলীয়া, ৰাজনীতিৰ বাবে দাঙ্গাক উচটনি নিদিব। যিসকলে দাঙ্গাক উচটনি দিছে তেওঁলোকে সমাজৰ ক্ষতি কৰিছে।’
মুখ্যমন্ত্রী বেনাৰ্জীয়ে কয়, ‘মনত ৰাখিব, মুছলমান সম্প্ৰদায়ৰ মাজত ক্ষোভৰ উদগীৰণ হোৱা এই আইনখন আমি বনোৱা নাই। এই আইনখন কেন্দ্ৰীয় চৰকাৰে আনিছে। গতিকে কেন্দ্ৰীয় চৰকাৰৰ পৰা ইয়াৰ উত্তৰ বিচাৰিব লাগে।’
তেওঁ লগতে কয়, ‘আমি এই বিষয়ত আমাৰ স্থিতি স্পষ্ট কৰি দিছো – আমি এই আইনখনক সমৰ্থন নকৰো। আমাৰ ৰাজ্যত এই আইন কাৰ্যকৰী নহ’ব। গতিকে প্ৰতিবাদৰ নামত হিংসা কিয়?’
আনহাতে ৱাকফ সংশোধনী আইনৰ বিৰোধিতাৰে কৰা প্ৰতিবাদৰ সময়ত হোৱা হিংসাত্মক ঘটনাক উচটনি দিয়াসকলৰ বিৰুদ্ধে আইনী ব্যৱস্থা গ্ৰহণ কৰাৰো ঘোষণা কৰে মুখ্যমন্ত্ৰী মমতা বেনাৰ্জীয়ে।
