নেশ্যনেল হেৰাল্ডৰ ধন সৰবৰাহৰ গোচৰত তদন্তকাৰী সংস্থা প্ৰৱৰ্তন সঞ্চালকালয় অৰ্থাত ইডিয়ে দাখিল কৰিলে চাৰ্জশ্বীট। তদন্তকাৰী সংস্থাটোৱে দাখিল কৰা চাৰ্জশ্বীটত নাম আছে কংগ্ৰেছৰ শীৰ্ষ নেতৃত্ব ক্ৰমে ছোনিয়া গান্ধী আৰু ৰাহুল গান্ধীৰ। প্ৰথমবাৰৰ বাবে দুয়োজনৰ বিৰুদ্ধে দাখিল হৈছে চাৰ্জশ্বীট।
নেশ্যনেল হেৰাল্ডৰ ধন সৰবৰাহৰ অভিযোগত প্ৰৱাসী কংগ্ৰেছ প্ৰমুখ ছেম পিট্ৰ’ডাৰ সৈতে কংগ্ৰেছৰ সাংসদ ৰাহুল গান্ধী আৰু ছোনিয়া গান্ধীৰ বিৰুদ্ধে দিল্লীৰ ৰাউজ এভিনিউ আদালতত ইডিয়ে অভিযোগনামা দাখিল কৰিছে। এই অভিযোগনামাত সুমন ডুবে আদিৰ নামো সন্নিবিষ্ট কৰা হৈছে।
ইডিৰ সূত্ৰই জানিব দিয়া অনুসৰি, ৬৬১.৬৯ কোটি টকাৰ সম্পত্তি এছ’চিয়েটেড জাৰ্নেলছ লিমিটেড (এজেএল) আৰু ৯০.২১ কোটি টকাৰ সম্পত্তি ইয়ং ইণ্ডিয়ান প্ৰাইভেট লিমিটেডৰ সৈতে জড়িত।
এই পৰ্যন্ত তদন্তকাৰী সংস্থাটোৱে এজেএল আৰু ইয়ং ইণ্ডিয়ানৰ প্ৰায় ৭৫১.৯ কোটি টকাৰ সম্পত্তি জব্দ কৰিছে। অভিযোগ অনুসৰি অপৰাধৰ দ্বাৰা কৰা উপাৰ্জনৰ পৰাই কোটি কোটি টকাৰ এই সম্পত্তি ক্ৰয় কৰা হৈছিল।
পিএমএলএৰ অধীনত দিল্লী, মুম্বাই আৰু লক্ষ্ণৌত এই অনুসন্ধান চলাইছিল ইডিয়ে। ইডিৰ সূত্ৰ অনুসৰি ৬৬১.৬৯ কোটি টকাৰ সম্পত্তি এজেএলৰ সৈতে সংযুক্ত হোৱাৰ বিপৰীতে প্ৰায় ৯০.২১ কোটি টকাৰ সম্পত্তি ইয়ং ইণ্ডিয়াৰ সৈতে জড়িত।
২০১৪ চনত ইডিয়ে দিল্লীৰ মহানগৰ দণ্ডাধীশৰ নিৰ্দেশত পিএমএলএৰ অধীনত এজেএল আৰু ইয়ং ইণ্ডিয়াৰ বিৰুদ্ধে তদন্ত আৰম্ভ কৰিছিল। তদন্তত প্ৰকাশ পাইছে যে এই গোচৰৰ অভিযুক্তই ইয়ং ইণ্ডিয়ানৰ জৰিয়তে এজেএলৰ শ শ কোটি টকাৰ সম্পত্তি অধিগ্ৰহণৰ বাবে অপৰাধমূলক ষড়যন্ত্ৰ ৰচনা কৰিছিল।
কাকতখন প্ৰকাশৰ বাবে চৰকাৰে ভাৰতৰ কেইবাখনো চহৰত ৰেহাই হাৰত মাটি দিছিল এজেএলক। ২০০৮ চনত এজেএলে প্ৰকাশ বন্ধ কৰি এই সম্পত্তিসমূহ বাণিজ্যিক উদ্দেশ্যত ব্যৱহাৰ কৰিবলৈ আৰম্ভ কৰে। এজেএলে সৰ্বভাৰতীয় কংগ্ৰেছ কমিটীক ৯০.২১ কোটি টকাৰ ঋণ পৰিশোধ কৰিবলগীয়া হৈছিল যদিও কংগ্ৰেছ দলে এই ৯০.২১ কোটি টকাৰ ঋণ ৰেহাই দি মাত্ৰ ৫০ লাখ টকাত এজেএলক নতুন কোম্পানী ইয়ং ইণ্ডিয়ানক বিক্ৰী কৰাৰ ষড়যন্ত্ৰ কৰে।
ইয়াৰ পিছত ইয়ং ইণ্ডিয়াৰ শ্বেয়াৰ গান্ধী পৰিয়াল আৰু তেওঁলোকৰ ঘনিষ্ঠ পৰিয়ালক দিয়া হ’ল, অৰ্থাৎ এজেএলৰ কোটি কোটি মূল্যৰ সম্পত্তি পৰোক্ষভাৱে ইয়ং ইণ্ডিয়ানৰ জৰিয়তে গান্ধী পৰিয়ালৰ নিয়ন্ত্ৰণলৈ আহিল।
এই গোচৰৰ অভিযুক্ত ছোনিয়া গান্ধী, ৰাহুল গান্ধী, অস্কাৰ ফাৰ্নাণ্ডেছ, মোটিলাল ভোহৰা আৰু সুমন ডুবে। এই সমগ্ৰ ঘটনা সন্দৰ্ভত ইডিয়ে ইতিমধ্যে ছোনিয়া গান্ধী আৰু ৰাহুল গান্ধীক জেৰা কৰিছে।
