বৃহস্পতিবাৰে উচ্চতম ন্যায়ালয়ে ৱাকফ (সংশোধনী) আইন, ২০২৫ৰ সাংবিধানিক বৈধতাক প্ৰত্যাহ্বান জনোৱা আবেদনৰ শুনানি গ্ৰহণ কৰে। বুধবাৰেও এই বিষয়ত শুনানি গ্ৰহণ কৰা হৈছিল।
মুখ্য ন্যায়াধীশ সঞ্জীৱ খান্নাৰ নেতৃত্বত গঠিত বিচাৰপীঠে ৭ দিনৰ ভিতৰত ‘ৱাকফ বাই ইউজাৰ’ বিষয়ত কেন্দ্ৰীয় চৰকাৰৰ পৰা উত্তৰ বিচাৰিছে। বৰ্তমান উচ্চতম ন্যায়ালয়ে ৱাকফ আইনৰ ওপৰত কোনো ধৰণৰ বাধা বা নিষেধাজ্ঞা আৰোপ কৰা নাই। কেন্দ্ৰক উত্তৰ দাখিল কৰিবলৈ ৭ দিনৰ সময় দিয়া হৈছে।
এই সময়ছোৱাত ‘ৱাকফ বাই ইউজাৰ’ত কোনো পৰিৱৰ্তন কৰা নহ’ব আৰু ৱাকফ ব’ৰ্ডত নতুন নিযুক্তিৰ ওপৰতো নিষেধাজ্ঞা আৰোপ কৰা হৈছে।
আৱেদনকাৰীয়ে পাঁচ দিনৰ ভিতৰত কেন্দ্ৰৰ উত্তৰৰ উত্তৰ দাখিল কৰিব পাৰিব বুলি আদালতে উল্লেখ কৰিছে, তাৰ পিছত অন্তৱৰ্তীকালীন আদেশৰ বাবে বিষয়টো তালিকাভুক্ত কৰিব। এই গোচৰৰ পৰৱৰ্তী শুনানি ৫ মে’ত হ’ব।
