ফাদিল হ’ল মাস্কৰ অধিক সন্তান জন্ম দিয়াৰ পৰিকল্পনা, কি ৰহস্য লুকাই আছে মাস্কৰ এনেধৰণৰ পৰিকল্পনাত…

এলন মাস্ক হৈছে বিশ্বৰ আটাইতকৈ ধনী ব্যক্তি। টেছলা আৰু স্পেচএক্সৰ দৰে উদ্ভাৱনৰ পিছত বৰ্তমান তেওঁ মনোযোগ দিছে নিজৰ অধিক সন্তান জন্ম দিয়াৰ ওপৰত।

দ্য ৱাল ষ্ট্ৰীট জাৰ্নেলৰ এক প্ৰতিবেদন অনুসৰি, মাস্কে আগন্তুক প্ৰজন্মক শক্তিশালী কৰাৰ বাবে অধিক আৰু অধিক সন্তান জন্ম দিয়াৰ পৰিকল্পনা কৰি আছে, যি সন্দৰ্ভত বহুতে কৈছে যে তেওঁ সন্তানৰ সেনাবাহিনী গঢ়ি তুলিব বিচাৰে।

প্ৰতিবেদনত দাবী কৰা হৈছে যে মাস্কে চেৰ’গেচিৰো সহায় লৈছে। তেওঁ মহিলাসকলৰ সৈতে গোপনীয় চুক্তি কৰিছে, য’ত সন্তান জন্ম দিয়াৰ সৈতে জড়িত বিষয়সমূহো অন্তৰ্ভুক্ত কৰা হৈছে। সন্তান জন্ম দিয়াৰ বিনিময়ত তেওঁ মহিলাসকলক ধনো আগবঢ়াইছে।

মাস্কৰ ত্ৰয়োদশ সন্তান জন্ম দিয়া মহিলা এছলী ছেইণ্ট ক্লেয়াৰে কয় যে, এই সমগ্ৰ বিষয়টো যেন এক নাটকৰ দৰে। তেওঁৰ মতে, মাস্কে তেওঁক কেইবাবাৰো গৰ্ভধাৰণৰ প্ৰস্তাৱ দিছিল আৰু ভৱিষ্যতে চেৰ’গেটৰ জৰিয়তে সন্তানৰ সংখ্যা বৃদ্ধিৰ পৰিকল্পনাত কাম কৰিবলৈ কয়।

ছেইণ্ট ক্লেয়াৰে লগতে কয় যে তেওঁক সন্তান জন্ম দিয়াৰ বিনিময়ত প্ৰতিমাহে ১০ৰ পৰা ১৫ মিলিয়ন ডলাৰৰ প্ৰস্তাৱ দিয়া হৈছিল। অৱশ্যে এটা চৰ্ত আছিল যে, তেওঁলোকে শিশুটিৰ জন্মৰ প্ৰমাণ পত্ৰৰ পৰা মাস্কৰ নাম আঁতৰাই পেলাব লাগিব। তেওঁ যে মাস্কৰ সন্তান সেই কথা ৰাজহুৱা কৰিব নোৱাৰিব। যদিও তেওঁ গোপনীয়তাৰ চুক্তিত স্বাক্ষৰ কৰা নাছিল, তথাপিও তেওঁ আইনী নথি-পত্ৰৰ পৰা মাস্কৰ নাম আঁতৰাই পেলাইছিল। ইয়াৰ পিছত তেওঁৰ মাহিলী সাহায্য ৪০ হাজাৰ ডলাৰৰ পৰা ২০ হাজাৰ ডলাৰলৈ হ্ৰাস পায়।

প্ৰতিবেদনত এই কথাও প্ৰকাশ পাইছে যে, মাস্কৰ দলটোৱে মহিলাসকলৰ সৈতে যোগাযোগ কৰি তেওঁলোকক চেৰ’গেট মাতৃ হ’বলৈ উৎসাহিত কৰে। মাক্সৰ সন্তানৰ চেৰ’গেট মাতৃ ক্ৰিপ্টো প্ৰভাৱশালী টিফানী ফঙে মাস্কে প্ৰেৰণ কৰা অফাৰসমূহ ৰাজহুৱাও কৰিছিল, তাৰ পিছত মাস্কে তেওঁক ছ’চিয়েল মিডিয়াত আনফ’ল’ কৰিছিল।

আকৌ মাস্কৰ ৪ সন্তানৰ আন এক মাতৃ হৈছে শ্বিভন জিলিছ। বিশ্বৰ নেতাসকলৰ বৈঠক আৰু ডাঙৰ ডাঙৰ অনুষ্ঠানত তেওঁক মাস্কৰ সৈতে সঘনাই দেখা দিয়ে।

আনহাতে, মাস্কৰ আন ৩ সন্তানৰ মাতৃ হৈছে গায়ক গ্ৰাইমছ। তেওঁ নিজৰ শিশুকেইটাৰ তত্ত্বাৱধানক লৈ ৰাজহুৱাভাৱে মাস্কৰ বিৰুদ্ধে যুঁজিছিল আৰু শিশুৰ চিকিৎসা জৰুৰীকালীন অৱস্থাত সহায়ৰ বাবে ছ’চিয়েল মিডিয়াত তেওঁক টেগো কৰিছিল।

বুদ্ধিমান আৰু সক্ষম মানুহে যদি অধিক সন্তান জন্ম নিদিয়ে, তেন্তে মানৱ সভ্যতাৰ পতন ঘটিব বুলি মাস্কৰ বিশ্বাস। সেইবাবেই তেওঁ নিজেও অধিক সন্তান জন্ম দিছে আৰু আনকো একে কাম কৰিবলৈ উৎসাহিত কৰিছে।