মঙলবাৰে জম্মু-কাশ্মীৰৰ অনন্তনাগৰ পহলগাম অঞ্চলত পৰ্যটকৰ ওপৰত হোৱা ভয়ংকৰ আক্ৰমণৰ ঘটনাক কঠোৰ ভাষাৰে গৰিহণা দিছে প্ৰধানমন্ত্ৰী নৰেন্দ্ৰ মোদীয়ে। সন্ত্ৰাসবাদীৰ আক্ৰমণত ২৭ জন পৰ্যটকৰ মৃত্যু হোৱাৰ আশংকা কৰাৰ লগতে আন বহু পৰ্যটক আহত হোৱাৰ খবৰ আহিছে।
বৰ্তমান ছৌদি আৰব ভ্ৰমণত থকা প্ৰধানমন্ত্ৰী মোদীয়ে সামাজিক মাধ্যম এক্সযোগে প্ৰতিক্ৰিয়া প্ৰকাশ কৰি পহলগামত হোৱা সন্ত্ৰাসবাদী আক্ৰমণত যিসকলে আপোনজনক হেৰুৱাইছে তেওঁলোকৰ প্ৰতি সমবেদনা জ্ঞাপন কৰাৰ লগতে আহতসকলৰো আশু আৰোগ্য কামনা কৰে।
প্ৰধানমন্ত্ৰী মোদীয়ে লগত ক্ষতিগ্ৰস্তসকলক সকলো ধৰণৰ সাহায্য প্ৰদানৰ আশ্বাস প্ৰদান কৰে। ইয়াৰ উপৰি এই জঘন্য ঘটনাৰ আঁৰত থকা লোকসকলক কোনো পধ্যেই ৰেহাই দিয়া নহ’ব বুলিও হুংকাৰ প্ৰদান কৰে।
উল্লেখ্য যে, দক্ষিণ কাশ্মীৰ জিলাৰ পহলগামৰ বৈছাৰণ অঞ্চলত দুপৰীয়া প্ৰায় ২:৩০ বজাত সন্দেহযুক্ত সন্ত্ৰাসবাদীয়ে পৰ্যটকৰ ওপৰত গুলীচালনা কৰিছিল। পৰ্যটকসকলৰ নাম আৰু ধৰ্ম শুধি আক্ৰমণ চলোৱা বুলি প্ৰত্যক্ষদৰ্শীয়ে মন্তব্য কৰে।
ইফালে এই ঘটনাৰ পিছতে প্ৰধানমন্ত্ৰী মোদীয়ে গৃহ মন্ত্ৰী অমিত শ্বাহৰ সৈতে ফোনযোগে বাৰ্তালাপ কৰি সমগ্ৰ ঘটনাৰ বুজ লয়। লগতে প্ৰধানমন্ত্ৰী মোদীৰ নিৰ্দেশত ইতিমধ্যে শ্ৰীনগৰত উপস্থিত হৈছে অমিত শ্বাহ।
এই নৃশংস সন্ত্ৰাসবাদী আক্ৰমণৰ দায়িত্ব লস্কৰে লোৱাৰ পিছতে সমগ্ৰ জম্মুতে জাৰি কৰা হৈছে হাই এলাৰ্ট। নিৰাপত্তাৰক্ষীৰ বৃহৎ দল মোতায়েন কৰাৰ লগতে সন্ত্ৰাসবাদীক বিচাৰি অভিযান তীব্ৰতৰ কৰি তুলিছে।
