বিগত বছৰ সমূহৰ দৰে আই পি এলৰ চলিত ছিজনতো দুৰ্দান্ত ফৰ্ম অব্যাহত আছে মডাৰ্ণ ডে’ ক্ৰিকেটৰ কিম্বদন্তী বিৰাট কোহলীৰ। ৩ মে’ অৰ্থাত শনিবাৰে অনুষ্ঠিত ১৮ সংখ্যক ছিজনৰ ৫২ সংখ্যক মেচখনতো অব্যাহত থাকিল কোহলীৰ বেটৰ যাদু।
শনিবাৰে চেন্নাই ছুপাৰ কিংছৰ বিৰুদ্ধে অনুষ্ঠিত মেচখনত কোহলীয়ে ৩৩টা বলত ৬২ ৰানৰ ইনিংছ খেলে। এই দৰ্শনীয় ইনিংছৰ জৰিয়তে কোহলীয়ে চলিত ছিজনতো সম্পূৰ্ণ কৰিলে ৫০০ ৰানৰ সংখ্যা। এতিয়ালৈকে খেলা ১১ খন মেচত তেওঁ সংগ্ৰহ কৰিছে ৫০৫ ৰান। সৰ্বাধিক ৰান সংগ্ৰহকাৰীৰ তালিকাত তেওঁ আছে শীৰ্ষ স্থানত।
চলিত ছিজনত ৫০০ ৰানৰ সংখ্যা অতিক্ৰম কৰাৰ লগে লগে কোহলীৰ নামত সংযোজন হয় এক বিশেষ অভিলেখ। আই পি এল ছিজনত সৰ্বাধিকবাৰ ৫০০ ৰানৰ সংখ্যা অতিক্ৰম কৰা প্ৰথমগৰাকী ক্ৰিকেটাৰত পৰিণত হয় কোহলী।
আই পি এল ছিজনত সৰ্বাধিকবাৰ ৫০০ ৰান সংগ্ৰহ কৰা ক্ৰিকেটাৰ
৮ বাৰ- বিৰাট কোহলী- ভাৰত
৭ বাৰ- ডেভিড ৱাৰ্নাৰ- অষ্ট্ৰেলিয়া
৬ বাৰ- কে এল ৰাহুল- ভাৰত
৫ বাৰ- শিখৰ ধাৱান- ভাৰত
উল্লেখ্য যে, চেন্নাইৰ বিৰুদ্ধে অনুষ্ঠিত মেচখনতেই বিৰাট কোহলীয়ে আই পি এল কেৰিয়াৰৰ ৬২ সংখ্যকো অৰ্ধশতক সম্পূৰ্ণ কৰে। এই মেচখনত ৰয়েল চেলেঞ্জাৰ্ছ বাংগালুৰুৱে চেন্নাই ছুপাৰ কিংছক ২ ৰানত পৰাস্ত কৰি পইণ্ট তালিকাৰ শীৰ্ষত উপনীত হয়।
