হাৰিয়ানাৰ কাইথালৰ সমীপত সংঘটিত হৈছে এক ভয়ংকৰ দুৰ্ঘটনা। যাত্ৰীৰে ভৰা এখন বাছ দুৰ্ঘটনাত পতিত হোৱাত থিতাতে ৪ জন লোকৰ মৃত্যু হোৱাৰ লগতে আন বহু লোক আহত হয়। যাত্ৰীবাহী বাছখন হিছাৰৰ পৰা চণ্ডীগড়লৈ গৈ আছিল বুলি জানিব পৰা গৈছে।
দুৰ্ঘটনা সংঘটিত হোৱাৰ পিছত দুৰ্ঘটনাস্থলীত এক অভাৱনীয় পৰিৱেশৰ সৃষ্টি হয়। জানিব পৰা অনুসৰি, সোমবাৰে নিশা প্ৰায় ৮ বজাত হিছাৰ-চণ্ডীগড় ৰাষ্ট্ৰীয় ঘাইপথৰ কলায়তৰ চিমলা গাঁৱৰ সমীপত পৰ্যটকেৰে ভৰা বাছখন দ’ খাৱৈত বাগৰি পৰে।
বাইক আৰোহীক বচাবলৈ গৈ এই দুৰ্ঘটনাটো সংঘটিত হয়। দুৰ্ঘটনাটোত চাৰিজন লোকৰ প্ৰাণ যোৱাৰ লগতে আন ১৭-১৮ গৰাকী যাত্ৰী গুৰুতৰভাৱে আহত হয়। এই পৰ্যন্ত মৃত লোকসকলৰ পৰিচয় জানিব পৰা হোৱা নাই।
দুৰ্ঘটনাটো সংঘটিত হোৱাৰ পিছত আৰক্ষী, উদ্ধাৰকাৰী দল আৰু স্থানীয় লোকসকলে গাড়ীৰ আইনা ভাঙি আহত যাত্ৰীসকলক উদ্ধাৰ কৰি সমীপৰ কেইবাখনো হাস্পতালত ভৰ্তি কৰোৱা হয়। হাইড্ৰা মেচিনৰ সহায়ত বাছখন খাৱৈৰ পৰা উদ্ধাৰ কৰা হয়।
এই দুৰ্ঘটনাটোক লৈ অঞ্চলটোত শোকাকূল পৰিৱেশে বিৰাজ কৰিছে।
