পশ্চিমীয়া বিশ্বত ভাৰতৰ সুস্বাদু আমৰ আছে বিপুল চাহিদা। প্ৰতি বছৰে বৃহৎ পৰিমাণৰ আম আমেৰিকালৈ ৰপ্তানি কৰা হয়। অৱশ্যে শেহতীয়াকৈ আমেৰিকাই বিমানবন্দৰৰ পৰাই কেইবা কোটি টকাৰ আম ঘূৰাই পঠিওৱাৰ খবৰ আহিছে।
আমেৰিকাৰ এই সিদ্ধান্তৰ ফলস্বৰূপে ৰপ্তানিকাৰীসকলে বৃহৎ লোকচানৰ সন্মুখীন হ’ব। প্ৰশ্ন হয়- আমেৰিকা প্ৰশাসনে কিয় হঠাতে এই সিদ্ধান্ত গ্ৰহণ কৰিলে?
ফাইনেন্সিয়েল টাইমছৰ এক প্ৰতিবেদন অনুসৰি চলিত মাহত লছ এঞ্জেলছ, ছান ফ্ৰান্সিস্কো, আটলাণ্টাৰ দৰে আমেৰিকাৰ বিভিন্ন বিমানবন্দৰত ভাৰতৰ পৰা যোৱা কমেও ১৫টা আমৰ চালান বাতিল কৰিছে। ফলত ভাৰতীয় আমৰ ব্যৱসায়ীসকলে ভাৰতীয় মুদ্ৰাত প্ৰায় ৪২.৭২ কোটি টকা লোকচানৰ সন্মুখীন হ’ব।
লক্ষ্যণীয় কথাটো হ’ল আমেৰিকাই এই সিদ্ধান্তৰ পিছত এতিয়া বৃহৎ পৰিমাণৰ আমখিনি ঘূৰাই আনিবলৈ ব্যৱসায়ীসকলে পুনৰ বৃহৎ মাচুল ভৰিব লাগিব। এই পৰিস্থিতিত ৰপ্তানিকাৰকসকলে আমবোৰ আমেৰিকাতেই এৰি দিয়াৰ কথা চিন্তা কৰিছে। তেন্তে কিন্তু কিয় এনে পৰিস্থিতিৰ সৃষ্টি হ’ল? কাৰ দোষ?
ফাইনেন্সিয়েল টাইমছত প্ৰকাশ পোৱা প্ৰতিবেদন অনুসৰি নৱী মুম্বাইৰ এটা নিৰ্দিষ্ট কাৰ্যালয়ত যোৱা ৮ আৰু ৯ মে’ত সকলো ৰপ্তানি পদ্ধতি সম্পূৰ্ণ কৰা হৈছিল। কিন্তু আমেৰিকাৰ শুল্ক আৰু সীমা সুৰক্ষা বিভাগে ৰপ্তানিৰ নথি-পত্ৰত ভুল আছিল বুলি উল্লেখ কৰি এই বিপুল পৰিমাণৰ আম গ্ৰহণ নকৰাৰ সিদ্ধান্ত লৈছে।
আমেৰিকাই কয় যে হয় নতুনকৈ ৰপ্তানি প্ৰক্ৰিয়া সম্পূৰ্ণ কৰিব লাগিব নহয় এই বিপুল পৰিমাণৰ আম নিজ দেশলৈ ঘূৰাই আনিব লাগিব নহয়টো নষ্ট কৰিব লাগিব।
ইফালে দেশৰ আম ব্যৱসায়ীসকলে অভিযোগ কৰিছে যে সংশ্লিষ্ট বিভাগৰ কাগজ-পত্ৰৰ ভুলৰ বাবেহে তেওঁলোকে ইমান বৃহৎ লোকচানৰ সন্মুখীন হৈছে।
বিভাগীয় কৰ্তৃপক্ষৰ ভুলৰ বাবে বৃহৎ লোকচানৰ সন্মুখীন হোৱা ব্যৱসায়ী সকলে লাভ কৰিবনে ক্ষতিপূৰণ? সেয়া পৰৱৰ্তী সময়ত লক্ষ্যণীয় হ’ব।
