প্ৰতীক্ষাৰ অন্ত। ইংলেণ্ডৰ বিৰুদ্ধে খেলিবলগীয়া টেষ্ট শৃংখলাৰ বাবে ঘোষণা কৰা হ’ল ১৮ জনীয়া সদস্যৰে গঠিত ভাৰতীয় দল। ইয়াৰ লগে লগে অন্ত পৰিল দীৰ্ঘদিন ধৰি চলি থকা অধিনায়ক কেন্দ্ৰিক জল্পনা কল্পনাৰ। মুখ্য প্ৰশিক্ষক আৰু নিৰ্বাচকে ভাৰতীয় টেষ্ট দলৰ নেতৃত্বৰ দায়িত্ব প্ৰদান কৰিছে শুভমন গীলক।
উল্লেখ্য যে, অনূৰ্ধ্ব ১৯ আৰু আই পি এলৰ দৰে ডাঙৰ টুৰ্ণামেণ্টত নেতৃত্ব দিয়াৰ অভিজ্ঞতা আছে শুভমন গীলৰ। সেয়ে ৰোহিত শৰ্মাৰ উত্তৰাধিকাৰী হিচাপে শুভমন গীলকেই বাছনি কৰা হৈছে। ইফালে উপ-অধিনায়কৰ দায়িত্ব প্ৰদান কৰা হৈছে উইকেটকীপাৰ বেটছমেন ঋষভ পন্তক।
আনহাতে ঘৰুৱা ক্ৰিকেট আৰু আই পি এলত ধাৰাবাহিকভাৱে দেখুৱাই অহা উন্নত প্ৰদৰ্শনৰ বাবে ইংলেণ্ড ভ্ৰমণ কৰিবলগীয়া ভাৰতীয় দলত স্থান পাইছে তামিলনাডুৰ উদীয়মান ক্ৰিকেটাৰ ছাই সুদৰ্শনে। বৰ্তমান ছাই সুদৰ্শন আই পি এলত সৰ্বাধিক ৰান সংগ্ৰহকাৰীৰ শীৰ্ষ স্থানত আছে।
ইয়াৰ উপৰি দীৰ্ঘদিনৰ মূৰত দললৈ প্ৰত্যাৱৰ্তন ঘটিল অনুভৱী বেটাৰ কৰুণ নায়াৰৰ। শেহতীয়া ঘৰুৱা ছিজনত যথেষ্ট উন্নতমানৰ প্ৰদৰ্শন আগবঢ়াইছিল কৰুণ নায়াৰে। ৩৩ বছৰীয়া কৰুণ নায়াৰে ২০২৭ চনৰ পৰা ভাৰতীয় দলৰ পৰা আঁতৰি আছিল।
ইংলেণ্ড ভ্ৰমণৰ বাবে ঘোষণা কৰা ১৮ জনীয়া ভাৰতীয় দল
শুভমন গীল (অধিনায়ক), ঋষভ পন্ত (উপ-অধিনায়ক), যশস্বী জয়ছৱাল, কে এল ৰাহুল, ছাই সুদৰ্শন, অভিমন্যু ঈশ্বৰণ, কৰুণ নায়াৰ, নিতীশ কুমাৰ ৰেড্ডী, ৰবীন্দ্ৰ জাদেজা, ধ্ৰুৱ জুৰেল, ৱাশ্বিংটন সুন্দৰ, চাৰ্দুল ঠাকুৰ, যশপ্ৰীত বুমৰাহ, মহম্মদ ছিৰাজ, প্ৰসিদ্ধ কৃষ্ণা, আকাশ দ্বীপ, অৰ্শদীপ সিং আৰু কুলদীপ যাদৱ।
পাঁচখন মেচৰ শৃংখলাটোৰ প্ৰথমখন মেচ ২০ জুনৰ পৰা আৰম্ভ হ’ব। শৃংখলাটোৰ অন্তিমখন মেচ হ’ব ৩১ জুলাইৰ পৰা।
