গুজৰাটৰ অনুভৱী অপেনাৰ প্ৰিয়াংক পাঞ্চালে তাৎক্ষণিকভাৱে কাৰ্যকৰী হোৱাকৈ সকলো ধৰণৰ ক্ৰিকেটৰ পৰা অৱসৰ লোৱাৰ কথা ঘোষণা কৰিছে। পাঞ্চালে ক্ৰিকেটৰ প্ৰতিটো ফৰ্মেটতে ইণ্ডিয়া এ আৰু গুজৰাট দলৰ নেতৃত্বৰ দায়িত্বও পালন কৰিছিল।
২০১৬/১৭ চনত ৰঞ্জি ট্ৰফী খিতাপ জয় কৰা ৰাজ্যিক দলৰ অংশ আছিল প্ৰিয়াংক। খিতাপ দখল কৰা ছিজনটোত পাঞ্চালে ৮৭.৩৩ গড়ে ১৩১০ ৰান সংগ্ৰহ কৰিছিল, যিটো আছিল প্ৰতিযোগিতাখনৰ সৰ্বাধিক ৰান সংগ্ৰহকাৰী।
ঘৰুৱা ক্ৰিকেটত ১৭ বছৰীয়া কেৰিয়াৰ আৰু প্ৰায় ৯ হাজাৰ ৰান সংগ্ৰহ কৰিও প্ৰিয়াংক পাঞ্চালে ভাৰতীয় দলত খেলাৰ সুযোগ লাভ নকৰিলে।
গুজৰাটৰ হৈ ঘৰুৱা ক্ৰিকেটত সৰ্বাধিক প্ৰথম শ্ৰেণীৰ শতক অৰ্জন কৰাৰ অভিলেখো আছে ৩৫ বছৰীয়া প্ৰিয়াংকৰ নামত।
সোঁহতীয়া অপেনাৰগৰাকীয়ে ২০১৫/১৬ বিজয় হাজাৰে ট্ৰফী আৰু ২০১২/১৩ আৰু ২০১৩/১৪ বৰ্ষৰ চৈয়দ মুস্তাক আলী ট্ৰফী জয়ী হোৱা গুজৰাট দলৰ অংশও আছিল।
পাঞ্চালে সোমবাৰে ছ’চিয়েল মিডিয়াৰ জৰিয়তে এটা আৱেগিকভৰা প’ষ্টৰ জৰিয়তে ক্ৰিকেটৰ সকলো ফৰ্মেটৰ পৰা অৱসৰ লোৱাৰ কথা ঘোষণা কৰে।
উল্লেখ্য যে, প্ৰিয়াংক পাঞ্চালে প্ৰথম শ্ৰেণী ক্ৰিকেটত ২৯টা শতক আৰু ৩৪টা অৰ্ধশতকৰ সহায়ত ৮৮৫৬ ৰান সংগ্ৰহ কৰিছে। তেওঁৰ সৰ্বোচ্চ ব্যক্তিগত স্ক’ৰ হৈছে ৩১৪। ইয়াৰ উপৰি লিষ্ট এ ক্ৰিকেটত ৮টা শতক আৰু ২১টা অৰ্ধশতকৰ সহায়ত ৩৬৭২ ৰান সংগ্ৰহ কৰিছে। ইফালে ৫৯টা টি-২০ ইনিংছত ৯টা অৰ্ধশতকৰ সহায়ত সংগ্ৰহ কৰিছে মুঠ ১৫২২ ৰান।
শেষৰখন প্ৰথম শ্ৰেণীৰ ক্ৰিকেটত পাঞ্চালে কেৰালাৰ বিৰুদ্ধে ১৪৮ ৰানৰ ইনিংছ খেলিছিল।
উল্লেখ্য যে, ২০২১ চনত টেষ্ট কেপ লাভ কৰাৰ সপোন জাগ্ৰত হৈছিল পাঞ্চালৰ। দক্ষিণ আফ্ৰিকাৰ বিৰুদ্ধে খেলা টেষ্ট শৃংখলটোত উপ-অধিনায়ক ৰোহিত শৰ্মা আঘাতৰ বাবে শৃংখলাৰ পৰা বাহিৰ হোৱাত বিচিচিআইয়ে প্ৰিয়াংক পাঞ্চালক দলত স্থান দিছিল। কিন্তু টেষ্ট ক্ৰিকেটত অভিষেক ঘটোৱাৰ সপোন পূৰণ নহ’ল পাঞ্চালৰ। ইয়াৰ উপৰি এই বেটছমেনজনে কেতিয়াও আই পি এলত খেলাৰ সুযোগ লাভ নকৰিলে।
