উত্তৰ প্ৰদেশৰ গাজিয়াবাদত সংঘটিত হৈছে এক মৰ্মান্তিক ঘটনা। গাজিয়াবাদৰ কৌশম্বী থানা এলেকাৰ অন্তৰ্গত বৈশালী ছেক্টৰ-৪ত অৱস্থিত গৌৰ গ্ৰেভিটি হাইটছৰ বাণিজ্যিক কমপ্লেক্সত শনিবাৰে বিয়লি এচিত গেছ ভৰোৱাৰ সময়ত হঠাতে হোৱা চিলিণ্ডাৰ বিস্ফোৰণত এজন যুৱকৰ থিতাতে মৃত্যু হয়। আনহাতে আনজন যুৱক গুৰুতৰভাৱে অগ্নিদগ্ধ হয়।
ঘটনাৰ তথ্য পোৱাৰ লগে লগে কৌশম্বী থানাৰ ভাৰপ্ৰাপ্ত বিষয়া অজয় কুমাৰ শৰ্মাই ততাতৈয়াকৈ সেই স্থানত উপস্থিত হৈ সমগ্ৰ ঘটনাৰ তদন্ত আৰম্ভ কৰে।
আৰক্ষীৰ মতে, দুয়োজন যুৱকে এচি মেৰামতি আৰু গেছ ৰিফিলিঙৰ কাম কৰে। শনিবাৰে দুয়োজনে এজন লোকৰ অনুৰোধত এচি ভৰোৱাৰ বাবে গৌৰ গ্ৰেভিটি হাইটছত উপস্থিত হৈছিল। এচি ভৰাই থকাৰ সময়তে হঠাৎ চিলিণ্ডাৰটো বিস্ফোৰণ ঘটাত অঞ্চলটোত আতংকৰ সৃষ্টি হয়।
বৰ্তমান আৰক্ষীয়ে গোচৰৰ তদন্ত আৰম্ভ কৰিছে আৰু সেই স্থানৰ পৰাই প্ৰমাণ সংগ্ৰহ কৰি আছে। আৰক্ষীৰ এটা দলে ধাৰাবাহিকভাৱে তদন্ত কৰি আছে আৰু বিস্ফোৰণ সংঘটিত হোৱা ঠাইৰ পৰা নমুনা সংগ্ৰহ কৰি আছে।
