ৰোহিত শৰ্মাই ক্ৰিকেটৰ দীঘলীয়া ফৰ্মেট টেষ্টৰ পৰা অৱসৰ ঘোষণা কৰাৰ পিছতেই ভাৰতীয় টেষ্ট দলৰ নেতৃত্ব প্ৰদান কৰিছে শুভমন গিলৰ ওপৰত। গিলক অধিনায়কত্ব প্ৰদান কৰা সন্দৰ্ভত প্ৰথমবাৰৰ বাবে প্ৰতিক্ৰিয়া প্ৰকাশ কৰিছে অষ্ট্ৰেলিয়াৰ কিম্বদন্তী ক্ৰিকেটাৰ ৰিকি পণ্টিঙে।
ৰিকি পণ্টিঙে কয় যে টেষ্ট ক্ৰিকেটত শুভমন গিলে ভাল প্ৰদৰ্শন কৰিবলৈ হ’লে বেটিঙৰ গুৰুত্ব প্ৰদান কৰিব লাগিব আৰু অধিনায়কত্বৰ অতিৰিক্ত বোজাৰ পৰা আঁতৰাই ৰাখিবলৈ হ’লে চতুৰ্থ ক্ৰমত বেটিং কৰিব লাগিব।
উল্লেখ্য যে বিৰাট কোহলীয়ে অৱসৰ গ্ৰহণ কৰাৰ পিছৰে পৰা আগন্তুক সময়ত ভাৰতৰ হৈ চতুৰ্থ ক্ৰমত কোনে বেটিং কৰিব সেয়া চৰ্চাৰ বিষয় হৈ আছে। পণ্টিঙে এই সন্দৰ্ভত কয় যে অধিনায়কত্বৰ প্ৰাৰম্ভিক পৰ্যায়ত গিলে চতুৰ্থ স্থানত বেটিং কৰিব লাগে।
এটা সংবাদ সংস্থাক দিয়া সাক্ষাতকাৰত পণ্টিঙে কয়, ‘বগা বলৰ ফৰ্মেটত গিলৰ ফৰ্ম সাংঘাতিক। টেষ্ট বেটিঙত তেওঁৰ কিছু কৰণীয় আছে। নতুনকৈ অধিনায়কত্ব লাভ কৰাৰ পিছত কিছু কঠিন হয়। নতুনকৈ অধিনায়কত্ব লাভ কৰাৰ পিছত নিজৰ বেটিঙৰ কথা চিন্তা কৰাটো সহজসাধ্য নহয়।’
তেওঁ লগতে কয় যে ভাৰতে গিলক অধিনায়কত্ব প্ৰদান কৰাটো সঠিক সিদ্ধান্ত। দুবাৰৰ বিশ্বকাপ বিজয়ী অধিনায়ক পণ্টিঙে কয়, ‘শেহতীয়া অষ্ট্ৰেলিয়া ভ্ৰমণৰ সময়ত যেতিয়া ৰোহিতে ছিডনী টেষ্ট নেখেলাৰ সিদ্ধান্ত লৈছিল তেতিয়া মোৰ দৃষ্টি গিলৰ ওপৰত আছিল। যশপ্ৰীত বুমৰাহৰ ফিটনেছক লৈ মোৰ সন্দেহ আছিল আৰু মেচৰ সময়ত তেওঁ আঘাতপ্ৰাপ্ত হৈছিল।’
উল্লেখ্য যে, মাত্ৰ ২৫ বছৰ বয়সতে গিল শেহতীয়াকৈ ভাৰতৰ টেষ্ট অধিনায়ক হিচাপে নিযুক্তি পোৱা আটাইতকৈ কম বয়সীয়া খেলুৱৈসকলৰ ভিতৰত অন্যতম। গিলে এতিয়ালৈকে ৩২খন টেষ্ট মেচ খেলিছে, য’ত তেওঁ গড়ে ৩৫.০৫ ৰানত পাঁচটা শতককে ধৰি মুঠ ১৮৯৩ ৰান সংগ্ৰহ কৰিছে।
