দুজনকৈ সফল পুত্ৰ থকাৰ পিছতো জীৱনৰ শেষ সময়ছোৱাত আশ্ৰয় বিচাৰি হাহাকাৰ কৰি ফুৰিছে এগৰাকী বৃদ্ধা মাতৃয়ে। আনকি, পুত্ৰ-বোৱাৰীৰ নিৰ্যাতন সহিব নোৱাৰি আৰক্ষীৰ কাষ চাপিছে বৃদ্ধাগৰাকীয়ে।
শিৱসাগৰ ফুকন নগৰ মেটেকাঘাটত সংঘটিত হৈছে এই ঘটনা। পুত্ৰ-বোৱাৰীৰ নিৰ্যাতন সহিব নোৱাৰি আৰক্ষীৰ কাষ চপা আইতাগৰাকী হৈছে ৮৫ বছৰীয়া গুণলতা বৰা।
জানিব পৰা মতে, প্ৰথমাৱস্থাত মাজু পুত্ৰৰ সৈতে বাস কৰিছিল গুণলতা বৰাই। মহাবিদ্যালয় এখনত কেৰাণীৰ চাকৰি কৰা মাজু পুত্ৰই ঘৰৰ পৰা বাহিৰ কৰি দিয়ে মাতৃক। তাৰ পিছত সৰু পুত্ৰৰ সৈতে থাকিবলৈ লয় গুণলতা বৰাই।
অৱশ্যে সৰু পুত্ৰৰ পত্নীয়ে মাতৃক ৰাখিবলৈ অস্বীকাৰ কৰে। যাৰবাবে জীৱনৰ অন্তিম সময়খিনি বৃদ্ধাশ্ৰমত কটোৱাৰ সিদ্ধান্ত গ্ৰহণ কৰিছিল বৃদ্ধাগৰাকীয়ে। স্থানীয়লোকে বৃদ্ধাশ্ৰমলৈ বুলি খোজ লোৱা বৃদ্ধাগৰাকীক উদ্ধাৰ কৰি পুনৰ ঘৰত থোৱাৰ ব্যৱস্থা কৰে।
ইফালে, গুণলতা বৰাৰ তিনি বিবাহিত জীয়ৰীয়ে মাতৃৰ কাষত উপস্থিত হৈ মাতৃক লগত লৈ শিৱসাগৰ আৰক্ষীৰ কাষ চাপে। আৰক্ষী থানাত অভিযোগ দাখিল কৰি মাতৃৰ নিৰাপত্তাৰ বাবে এটা সু-ব্যৱস্থা কৰিব দিবলৈ আৰক্ষীক অনুৰোধ জনাই তিনি বিবাহিত জীয়ৰীয়ে।
লগতে, মুখ্যমন্ত্ৰী হিমন্ত বিশ্ব শৰ্মাকো বিষয়টো গুৰুত্ব সহকাৰে চাবলৈ অনুৰোধ জনাই মাতৃয়ে।
