বৃহস্পতিবাৰে পুৱা ৰুদ্ৰপ্ৰয়াগ জিলাৰ ঋষিকেশ-বদ্ৰীনাথ ঘাইপথৰ ঘোলতীৰৰ সমীপত সংঘটিত হয় এক ভয়ংকৰ পথ দুৰ্ঘটনা। বদ্ৰীনাথ দৰ্শনলৈ যাত্ৰী কঢ়িয়াই অনা এখন টেম্পো-ট্ৰেভেলাৰ নিয়ন্ত্ৰণ হেৰুৱাই অলকনন্দা নদীত বাগৰি পৰে। গাড়ীখনত চালকসহ ১৯জন লোক আছিল। ১৭ জন লোক আছিল এটা পৰিয়ালৰ।
দুৰ্ঘটনাৰ খবৰ লাভ কৰাৰ লগে লগে আৰক্ষী, এছ ডি আৰ এফ আৰু জিলা প্ৰশাসনৰ এটা দল ঘটনাস্থলত উপস্থিত হৈ উদ্ধাৰ কাৰ্য আৰম্ভ কৰে। জানিব পৰা অনুসৰি, ৰাজস্থানৰ এটা পৰিয়ালৰ ১৭ গৰাকী লোকে বাহনখনেৰে চাৰধাম যাত্ৰালৈ গৈছিল। এই পৰিয়ালটোৱে কেদাৰনাথ দৰ্শন কৰি আজি পুৱা বদ্ৰীনাথ দৰ্শনৰ বাবে যোৱাৰ সময়তে দুৰ্ঘটনাত পতিত হয়।
দুৰ্ঘটনাত গুৰুতৰভাৱে আহত হোৱা পৰিয়ালটোৰ তিনিজন সদস্যক উন্নত চিকিৎসাৰ বাবে বিমানেৰে লৈ যোৱা হৈছে। ইফালে জিলা প্ৰশাসনৰ এগৰাকী শীৰ্ষ বিষয়াই জনোৱা অনুসৰি এতিয়ালৈকে ৯ জন লোকক উদ্ধাৰ কৰা হৈছে আৰু ইয়াৰে দুজনৰ ইতিমধ্যেই মৃত্যু ঘটিছে। এতিয়াও সন্ধানহীন হৈ আছে কমেও ১০ গৰাকী লোক।
আনহাতে এই দুৰ্ঘটনাটো অতি দুখজনক বুলি মন্তব্য কৰি ৰাজ্যখনৰ মুখ্যমন্ত্ৰী ধামীয়ে জিলা প্ৰশাসনক সকলো প্ৰকাৰৰ সহায় সহযোগিতা আগবঢ়াবলৈ নিৰ্দেশ প্ৰদান কৰিছে।
