কলকাতাত এল এল বি ছাত্ৰীক দলবদ্ধ অপকৰ্মৰ গোচৰত উচ্চতম ন্যায়ালয়ত আবেদন দাখিল কৰা হৈছে। উচ্চতম ন্যায়ালয়ৰ অধিবক্তা সত্যম সিঙে ৩০ জুনত আদালতৰ তত্বাৱধানত চিবিআইৰ তদন্তৰ দাবীত এখন আবেদন দাখিল কৰিছে।
আৱেদনখনত উল্লেখ কৰা হৈছে যে, নিৰ্ধাৰিত সময়সীমাৰ ভিতৰত তদন্ত কৰিব লাগে। আৱেদনখনত নিৰাপত্তা আৰু ক্ষতিপূৰণৰ দাবীও কৰা হৈছে। তৃণমূলৰ সাংসদ কল্যাণ বেনাৰ্জী আৰু বিধায়ক মদন মিত্ৰই ভুক্তভোগীক লৈ দিয়া অপমানজনক বক্তব্যও উল্লেখ কৰে আবেদনকাৰীয়ে।
উল্লেখ্য যে, ২৫ জুনত দক্ষিণ কলিকতা আইন মহাবিদ্যালয়ৰ এগৰাকী প্ৰথম বৰ্ষৰ ছাত্ৰীক দুগৰাকী জ্যেষ্ঠ ছাত্ৰ আৰু এগৰাকী প্ৰাক্তন ছাত্ৰই দলবদ্ধ অপকৰ্ম সংঘটিত কৰাৰ গোচৰ পোহৰলৈ আহে। এই গোচৰ পোহৰলৈ অহাৰ পিছতে ভাৰতীয় জনতা পাৰ্টি আৰু কংগ্ৰেছ দলে ক্ষোভিত হৈ বংগৰ আইন-শৃংখলাৰ পৰিস্থিতিৰ ওপৰত প্ৰশ্ন উত্থাপন কৰিছে।
দেওবাৰে বিজেপিৰ জ্যেষ্ঠ নেতা সুবেন্দু অধিকাৰীয়েও নেতৃত্ব দি পশ্চিমবংগৰ প্ৰতিগৰাকী কন্যাৰ সুৰক্ষাৰ দাবী জনায়। ভাৰতীয় কমিউনিষ্ট পাৰ্টি আৰু নাগৰিক সমাজৰ সদস্যসকলেও একেধৰণৰ ৰেলী উলিয়ায়।
পশ্চিম বংগ বিধানসভাৰ বিৰোধী দলপতি সুবেন্দু অধিকাৰী আৰু অন্যান্য দলীয় কৰ্মীসকলে “আমাৰ কন্যা”ৰ সুৰক্ষাৰ দাবীত খোজকাঢ়ি এক কিলোমিটাৰতকৈ অলপ কম সময়ৰ ভিতৰতে পদযাত্ৰা আৰম্ভ কৰে। তেওঁ কয় যে, মমতা বেনাৰ্জীক ক্ষমতাৰ পৰা অপসাৰণ নকৰালৈকে বংগত মহিলাৰ বিৰুদ্ধে এনেধৰণৰ ঘটনা অব্যাহত থাকিব। কিয়নো বিগত সময়ত মুখ্যমন্ত্ৰীগৰাকীয়ে অপৰাধীৰ বিৰুদ্ধে কঠোৰ ব্যৱস্থা গ্ৰহণ কৰাৰ পৰিৱৰ্তে ভুক্তভোগী মহিলাসকলৰ চৰিত্ৰক লৈহে সন্দেহ কৰিছিল।
