ভাৰতীয় লোকসেৱা আয়োগৰ অধ্যক্ষ মনোজ ছোনীৰ পদত্যাগ। কাৰ্যকাল সমাপ্ত হোৱাৰ পূৰ্বে পদত্যাগ পত্ৰ দাখিল কৰিলে অধ্যক্ষগৰাকীয়ে। ২০২৯ চনলৈ কাৰ্যকাল আছিল মনোজ ছোনীৰ। ব্যক্তিগত কাৰণত পদত্যাগ পত্ৰ দাখিল কৰা বুলি উল্লেখ কৰিছে মনোজ ছোনীয়ে।
২০১৭ চনত ভাৰতীয় লোকসেৱা আয়োগৰ সদস্যৰূপে অন্তৰ্ভুক্ত হৈছিল মনোজ ছোনী। ইয়াৰ পিছতে ২০২৩ চনৰ ১৬ মে’ত ভাৰতীয় লোকসেৱা আয়োগৰ অধ্যক্ষ পদৰ দায়িত্ব লৈছিল মনোজ ছোনীয়ে। অৱশ্যে, অধ্যক্ষৰ ৬ বছৰীয়া কাৰ্যকাল সমাপ্ত হোৱাৰ পূৰ্বে পদত্যাগ পত্ৰ ৰাষ্ট্ৰপতিৰ ওচৰত দাখিল কৰিলে অধ্যক্ষ মনোজ ছোনীয়ে।
জানিব পৰা মতে, প্ৰধানমন্ত্ৰী নৰেন্দ্ৰ মোদীৰ অতি ঘনিষ্ঠ আছিল মনোজ ছোনী। ভাৰতীয় লোকসেৱা আয়োগত অন্তৰ্ভুক্ত হোৱাৰ পূৰ্বে গুজৰাটৰ দুখনকৈ বিশ্ববিদ্যালয়ত তিনিবাৰকৈ উপাচাৰ্য হিচাপে কাৰ্যনিৰ্বাহ কৰিছিল বিষয়াগৰাকীয়ে। ইয়াৰ ভিতৰত বাবাচাহেব আম্বেদকাৰ মুক্ত বিশ্ববিদ্যালয়ত দুবাৰকৈ উপাচাৰ্যৰ কাৰ্যভাৰ গ্ৰহণ কৰিছিল।
উল্লেখ্য যে, ভাৰতীয় লোকসেৱা আয়োগ হৈছে ভাৰতীয় প্ৰশাসনিক সেৱাৰ পৰীক্ষাৰ লগতে বহুতো গুৰুত্বপূৰ্ণ পৰীক্ষা পৰিচালনা কৰা এটা সংস্থা। যিয়ে সৰ্বভাৰতীয় পৰ্যায়ত ভাৰতৰ শীৰ্ষ পদবীসমূহৰ বাবে পৰীক্ষা অনুষ্ঠিত কৰে।
