কৰ্ণাটকত শাসকীয় কংগ্ৰেছ দল আৰু প্ৰধান বিৰোধী দল বিজেপিৰ মাজত বৃদ্ধি পাইছে বোকা ছটিওৱাৰ ৰাজনীতি। ৰাজ্যখনৰ মন্ত্ৰী প্ৰিয়াংক খাৰ্গেই ৰাষ্ট্ৰীয় স্বয়ংসেৱক সংঘ চমুকৈ আৰ এছ এছক নিষিদ্ধ কৰিব লাগে বুলি কৰা মন্তব্যই দুয়োটা দলৰ মাজত বৃদ্ধি পোৱা বিতৰ্কক অধিক মাত্ৰা প্ৰদান কৰিছে।
খাৰ্গেই পুনৰবাৰ কয় যে আৰ এছ এছৰ ওপৰত নিষেধাজ্ঞা প্ৰত্যাহাৰ কৰাটো ভুল আছিল। তেওঁ লগতে আৰ এছ এছক ধৰ্মনিৰপেক্ষতা আৰু সমাজবাদৰ বিৰোধী বুলিও অভিযোগ উত্থাপন কৰে।
তেওঁ কয় যে কংগ্ৰেছে ইয়াৰ পূৰ্বে দুবাৰকৈ আৰ এছ এছত নিষেধাজ্ঞা আৰোপ কৰিছিল, আৰু তেওঁলোকে এই নিষেধাজ্ঞা উঠাই লোৱাৰ বাবে অনুশোচনা কৰিছে।
মঙলবাৰে মন্ত্ৰী প্ৰিয়াংক খাৰ্গেই কয়, ‘বিজেপিয়ে প্ৰথমে সংবিধানখন চাব লাগে, য’ত ধৰ্মনিৰপেক্ষতাৰ কথা উল্লেখ আছে। প্ৰথমে ইয়াৰ পৰা ধৰ্মনিৰপেক্ষতা আঁতৰাব লাগে আৰু তাৰ পিছত সংবিধানৰ কথা হ’ব লাগে। সংবিধানৰ প্ৰতি এলাৰ্জী আছে আৰ এছ এছৰ, বাবা চাহেব ভীমৰাও আম্বেদকাৰে সংবিধান সভাত ইয়াক (সংবিধান) প্ৰস্তাৱ কৰাৰ পিছৰে পৰা তেওঁলোকৰ সমস্যা হৈছে। মনুস্মৃতিৰ সৈতে প্ৰেম আছে আৰ এছ এছৰ।’
আৰ এছ এছক লক্ষ্য কৰি খাৰ্গেই পুনৰ কয়, ‘আৰ এছ এছৰ সদায় এটা জাতি, এক ধৰ্মৰ এজেণ্ডা আছিল। এইটো কোনো নতুন কথা নহয়। সংবিধানে আমাক মৰ্যাদা আৰু আত্মসন্মানৰ জীৱন দিয়ে বাবে তেওঁলোকৰ সদায় এলাৰ্জী হৈ আহিছে। ই প্ৰতিটো ধৰ্ম আৰু প্ৰতিটো জাতিক ৰাজনৈতিক, অৰ্থনৈতিক আৰু সামাজিক সমতা প্ৰদান কৰে।’
উল্লেখ্য যে, শেহতীয়াকৈ বিজেপি আৰু আৰ এছৰ একাংশ নেতাই সংবিধানৰ পৰা ধৰ্মনিৰপেক্ষ আৰু সমাজতান্ত্ৰিক শব্দযুগল প্ৰত্যাহাৰৰ দাবী উঠোৱাৰ পিছতেই প্ৰিয়াংগ খাৰ্গেই আৰ এছ এছক নিষিদ্ধকৰণ কৰিব লাগে বুলি মন্তব্য কৰে।
