৩ জুলাইত আফ্ৰিকান দেশ ঘানাত উপস্থিত হয় প্ৰধানমন্ত্ৰী নৰেন্দ্ৰ মোদী। ৩০ বছৰৰ অন্তত ভাৰতৰ প্ৰধানমন্ত্ৰীৰ এয়া প্ৰথম ভ্ৰমণ। ৰাজধানী আক্ৰাৰ বিমানবন্দৰত মোদীক উষ্ম আদৰণি জনায় ঘানাৰ ৰাষ্ট্ৰপতি জন ড্ৰামানী মহামাই। এই উপলক্ষে প্ৰধানমন্ত্ৰী মোডীক গাৰ্ড অৱ অ’নাৰৰ সৈতে ২১ জাঁই টোপৰ চেল্যুট দিয়া হয়।
গ্ল’বেল চাউথ আৰু আটলাণ্টিকৰ দুয়ো মূৰৰ দেশসমূহৰ সৈতে ভাৰতৰ কৌশলগত অংশীদাৰিত্ব শক্তিশালী কৰাৰ দিশত প্ৰধানমন্ত্ৰীৰ এই ভ্ৰমণ গুৰুত্বপূৰ্ণ। এই বিদেশ ভ্ৰমণৰ অধীনত প্ৰধানমন্ত্ৰী মোদীয়ে ঘানাৰ উপৰিও ট্ৰিনিদাদ এণ্ড ট’বাগো, আৰ্জেণ্টিনা, ব্ৰাজিল আৰু নামিবিয়াও ভ্ৰমণ কৰিব।
ৰাষ্ট্ৰপতি মহামাৰ আমন্ত্ৰণত মোদীয়ে ঘানা ভ্ৰমণলৈ গৈছিল। তেওঁ ঘানাক গ্ল’বেল চাউথৰ এক গুৰুত্বপূৰ্ণ অংশীদাৰ বুলি অভিহিত কৰে যিয়ে আফ্ৰিকান ইউনিয়ন আৰু পশ্চিম আফ্ৰিকান ৰাষ্ট্ৰৰ অৰ্থনৈতিক সম্প্ৰদায়ত গুৰুত্বপূৰ্ণ ভূমিকা পালন কৰে।
এই ভ্ৰমণে বিনিয়োগ, শক্তি, স্বাস্থ্য, নিৰাপত্তা আৰু উন্নয়ন সহযোগিতাৰ ক্ষেত্ৰত ভাৰত-ঘানাৰ সম্পৰ্ক আৰু অধিক শক্তিশালী কৰিব বুলি প্ৰধানমন্ত্ৰীয়ে আশা প্ৰকাশ কৰে। লগতে তেওঁ কয় যে ঘানাৰ সংসদত ভাষণ দিয়াটো তেওঁৰ বাবে এক সন্মানৰ বিষয় হ’ব।
ইয়াৰ পিছত ৩-৪ জুলাইত ট্ৰিনিদাদ আৰু ট’বাগো ভ্ৰমণ কৰিব প্ৰধানমন্ত্ৰী মোদীয়ে। তেওঁ এই দ্বীপ দেশখনক ভাৰতৰ সৈতে গভীৰ ঐতিহাসিক, সাংস্কৃতিক আৰু জনসংযোগ ভিত্তিক সম্পৰ্কৰ বাহক বুলি অভিহিত কৰে। প্ৰধানমন্ত্ৰীয়ে ৰাষ্ট্ৰপতি ক্ৰীষ্টিন কাৰ্লা কংগালু আৰু প্ৰধানমন্ত্ৰী কমলা প্ৰসাদ বিছেছাৰক সাক্ষাৎ কৰিব বুলি কয়। প্ৰধানমন্ত্ৰী মোদীয়ে কয় যে, ১৮০ বছৰ পূৰ্বে ভাৰতীয়সকলে প্ৰথমবাৰৰ বাবে ট্ৰিনিদাদ আৰু ট’বাগোত উপস্থিত হৈছিল। এই ভ্ৰমণ আমাৰ সাংস্কৃতিক আৰু পাৰিবাৰিক বন্ধন পুনৰুজ্জীৱিত কৰাৰ এক সুযোগ।
ট্ৰিনিদাদৰ পিছত প্ৰধানমন্ত্ৰী মোদীয়ে আৰ্জেণ্টিনাৰ ৰাজধানী বুয়েনছ আয়াৰ্ছলৈ যাব, যি ভাৰতৰ প্ৰধানমন্ত্ৰীৰ বিগত ৫৭ বছৰৰ ভিতৰত প্ৰথম আনুষ্ঠানিক ভ্ৰমণ হ’ব। তেওঁ আৰ্জেণ্টিনাক লেটিন আমেৰিকাত ভাৰতৰ প্ৰধান অৰ্থনৈতিক অংশীদাৰ আৰু জি-২০ৰ ঘনিষ্ঠ মিত্ৰ বুলি অভিহিত কৰে।
অহা ৬-৭ জুলাইত ব্ৰাজিলৰ ৰিঅ’ ডি জেনেইৰ’ত অনুষ্ঠিত হ’বলগীয়া ব্ৰিকছ সন্মিলনত অংশগ্ৰহণ কৰিব প্ৰধানমন্ত্ৰী মোদীয়ে। তেওঁ কয় যে, ভাৰতে প্ৰতিষ্ঠাপক সদস্য হিচাপে ব্ৰিকছক উদীয়মান অৰ্থনীতিৰ বাবে এক ডাঙৰ মঞ্চ বুলি গণ্য কৰে।
