ৰোগীৰ সন্মতি অবিহনে কাছাৰৰ শিলচৰস্থিত এখন ব্যক্তিগত চিকিৎসালয়ত বায়’পছি টেষ্টৰ সময়ত চিকিৎসকে এগৰাকী ২৮ বছৰীয়া যুৱকৰ গুপ্তাংগ আঁতৰাই দিয়াৰ ভয়ংকৰ অভিযোগ উত্থাপন হৈছে।
শিলচৰৰ আৰ ই নামৰ ব্যক্তিগত হাস্পতালত সংঘটিত এই ভয়ংকৰ ঘটনাৰ পিছতে হাস্পতালখনৰ চিকিৎসকৰ বিৰুদ্ধে গোচৰ ৰুজু কৰা হৈছে বুলি জানিব পৰা গৈছে।
জানিব পৰা অনুসৰি, চুবুৰীয়া মণিপুৰ ৰাজ্যৰ এগৰাকী ২৮ বছৰীয়া ৰোগীৰ বায়’পছি টেষ্টৰ নামত হাস্পতালখনৰ এজন চিকিৎসকে অস্ত্ৰোপচাৰৰ জৰিয়তে ৰোগীজনৰ দেহৰ পৰা বিছিন্ন কৰে গুপ্তাংগ।
এই চাঞ্চল্যকৰ ঘটনাৰ পিছতে ভুক্তভোগী ৰোগীজনে শিলচৰৰ ঘুংগুৰ আৰক্ষী চকীত চিকিৎসক ইডেন সিনহাৰ বিৰুদ্ধে এজাহাৰ দাখিল কৰে।
জানিব পৰা মতে, কিছু দিন পূৰ্বে চুবুৰীয়া মণিপুৰৰ জিৰিবাম জিলাৰ আতিকুৰ ৰহমান নামৰ ৰোগীজনে গুপ্তাংগত হৈ থকা কিছু অসুবিধাৰ বাবে শিলচৰৰ আৰ ই হাস্পতাললৈ চিকিৎসাৰ বাবে আহিছিল।
ইয়াৰ পিছতে হাস্পতালখনৰ চিকিৎসক ডাঃ ইডেন সিনহাৰ নেতৃত্বত আতিকুৰ ৰহমানৰ আৰম্ভ হয় চিকিৎসা। ৰোগী জনৰ বিভিন্ন টেষ্ট কৰাৰ পাছত চিকিৎসক ইডেন সিনহায় কয় যে এতিয়া বায়’পছি টেষ্ট কৰাব লাগিব। ইয়াৰ পিছতে সংঘটিত হয় এই ভয়ংকৰ ঘটনাটো।
উত্থাপিত অভিযোগ অনুসৰি বায়’পছি টেষ্টৰ নামত ৰোগীজনৰ গুপ্তাংগ কাটি পেলাই চিকিৎসক ইডেন সিনহাই।
ৰোগীজনে সংবাদ মাধ্যমৰ আগত উল্লেখ কৰি কয় যে বায়’পছি টেষ্ট কৰাৰ বাবে তেওঁক হাস্পতালৰ অপাৰেশ্যন থিয়েটাৰত নিয়া হয়। আৰু তাতে তেওঁৰ অনুমতি অবিহনে তেওঁৰ গুপ্তাংগৰ অস্ত্ৰোপচাৰ কৰে চিকিৎসক ইডেন সিনহাই।
প্ৰথম অবস্থাত তেওঁ এই সমগ্ৰ বিষয়টোক লৈ অজ্ঞাত আছিল যদিও ড্রেছিং খোলাৰ পাছতহে সমগ্ৰ ঘটনাটো পোহৰলৈ আহে। লগে লগে তেওঁ ঘটনাটোৰ বিষয়ে জানিবলৈ চিকিৎসকক সাক্ষাত কৰিব বিচাৰিছিল যদিও হাস্পতাল কৰ্তৃপক্ষই তেওঁক চিকিৎসকক সাক্ষাত কৰিব নিদিয়াৰো অভিযোগ উত্থাপন কৰিছে।
সেয়ে পিছত অসহায় হৈ আৰক্ষীৰ দ্বাৰস্থ হয় ভুক্তভোগী ৰোগীজন। চিকিৎসক ডাঃ ইডেন সিনহাৰ বিৰুদ্ধে গোচৰ ৰুজু কৰি ঘটনাৰ উচিত ন্যায়ৰ দাবী জনাইছে অসহায় লোকজনে।
