বিলাসীপাৰাৰ চাপৰৰ পিছত আজি গোৱালপাৰা জিলাৰ কৃষ্ণাইৰ পাইকান সংৰক্ষিত বনাঞ্চলত প্ৰশাসনে চলাই উচ্ছেদ অভিযান। ১৪০ হেক্টৰ ভূমিত অবৈধভাৱে দখল কৰি থকা ১০৮০টা সন্দেহযুক্ত পৰিয়ালক উচ্ছেদ চলাই প্ৰশাসনে।
জিলাখনত এমাহৰ ভিতৰত দ্বিতীয়বাৰৰ বাবে প্ৰশাসনে চলাই উচ্ছেদ অভিযান। ইয়াৰ পূৰ্বে ১৬ জুনত গোৱালপাৰা চহৰৰ সমীপৰ হাছিলাবিল জলাশয়ত অবৈধভাৱে বাস কৰি থকা ৬৯০টা পৰিয়ালক উচ্ছেদ কৰিছিল।
উল্লেখ্য যে, চৰকাৰ তথা প্ৰশাসনে বিগত এটা মাহৰ ভিতৰত ৰাজ্যৰ চাৰিখন জিলাৰ পাঁচটা অঞ্চলত চলাইছে উচ্ছেদ অভিযান। এই অভিযানৰ জৰিয়তে ৩,৫০০টা পৰিয়ালক উচ্ছেদ কৰা হৈছে।
ইফালে আজি গোৱালপাৰাৰ পাইকান সংৰক্ষিত বনাঞ্চলত চলোৱা উচ্ছেদ অভিযানৰ সময়ত প্ৰশাসনে সৰ্বমুঠ ২,৭০০টা ঘৰ তথা সম্পত্তি ভাঙি পেলাইছে। গোৱালপাৰাৰ সংমণ্ডল বন বিষয়া (ডি এফ অ’) তেজস মাৰিস্বামীয়ে এই তথ্য প্ৰদান কৰে।
চৰকাৰ তথা প্ৰশাসনৰ তৰফৰ পৰা জনোৱা অনুসৰি, কৃষ্ণাই বনসংমণ্ডলৰ অধীনৰ পাইকান সংৰক্ষিত বনাঞ্চলত চলোৱা এই উচ্ছেদ অভিযানৰ লক্ষ্য হৈছে বনাঞ্চল ধ্বংস যজ্ঞ ধ্বংস কৰা। ইয়াৰ উপৰি জিলাখনত বৃদ্ধি পোৱা হাতী-মানুহৰ সংঘাত ৰোধ কৰাৰ বাবেও এই বনাঞ্চলখনত কল গছ ৰোপন কৰা হ’ব বুলিও উল্লেখ কৰে প্ৰশাসনে।
