দক্ষিণ ভাৰতীয় চিনেমাৰ অন্যতম কিংবদন্তি তাৰকা কোটা শ্ৰীনিবাস ৰাৱে ৮৩ বছৰ বয়সত শেষ নিশ্বাস ত্যাগ কৰে। অত্যন্ত জনপ্ৰিয় অভিনেতাগৰাকীৰ মৃত্যুত মনোৰঞ্জন জগতত শোকৰ ছাঁ পৰা পৰিলক্ষিত হৈছে।
অন্ধ্ৰ প্ৰদেশৰ মুখ্যমন্ত্ৰী এন চন্দ্ৰবাবু নাইডুৱে টুইট কৰি অভিনেতা গৰাকীৰ পৰিয়াললৈ সমবেদনা জ্ঞাপন কৰি চিনেমা জগতৰ বাবে এক বৃহৎ ক্ষতি বুলি অভিহিত কৰিছে।
তেওঁ লিখিছে, ‘বহুমুখী চৰিত্ৰৰে চিনেমা দৰ্শকৰ হৃদয় জয় কৰা প্ৰখ্যাত অভিনেতা কোটা শ্ৰীনিবাস ৰাওৰ মৃত্যু অত্যন্ত দুখজনক। প্ৰায় চাৰি দশকত চিনেমা আৰু থিয়েটাৰৰ ক্ষেত্ৰখনলৈ তেওঁৰ কলাত্মক অৱদান আৰু তেওঁ অভিনয় কৰা ভূমিকাসমূহ অবিস্মৰণীয় হৈ থাকিব।
মুখ্যমন্ত্ৰীগৰাকীয়ে লগতে কয় যে অভিনেতাগৰাকীৰ মৃত্যু তেলেগু চলচ্চিত্ৰ জগতৰ বাবে এক অপূৰণীয় ক্ষতি। ১৯৯৯ চনত বিজয়ৱাড়াৰ পৰা বিধায়ক হিচাপে জয়লাভ কৰি জনসাধাৰণৰ সেৱা আগবঢ়াইছিল। তেওঁৰ পৰিয়ালৰ সদস্যসকলক গভীৰ সমবেদনা জ্ঞাপন কৰিছো।
তেলেগু চলচ্চিত্ৰ জগতত শ্ৰীনিবাস ৰাও আছিল এক ডাঙৰ নাম। ১৯৭৮ চনত ‘প্ৰাণম খাৰিডু’ ছবিৰ জৰিয়তে তেওঁ প্ৰথমবাৰৰ বাবে আত্মপ্ৰকাশ কৰে। ৪০ বছৰতকৈও অধিক সময়ৰ অভিনয় জীৱনত তেওঁ ৭৫০ খনতকৈও অধিক ছবিত কাম কৰিছিল।
২০১৫ চনত অভিনেতাগৰাকীক পদ্মশ্ৰী বঁটাৰে সন্মানিত কৰা হৈছিল। তেলেগুৰ উপৰি ৰাৱে তামিল, হিন্দী, কানাড়া আৰু মালয়ালম চিনেমাত কাম কৰিছিল।
অভিনয়ৰ সমান্তৰালকৈ প্ৰবীণ অভিনেতাগৰাকীয়ে সক্ৰিয় ৰাজনীতিতো জড়িত আছিল। ১৯৯৯ চনৰ পৰা ২০০৪ চনলৈ তেওঁ অন্ধ্ৰ প্ৰদেশৰ বিজয়াৱাড়া ইষ্টৰ পৰা বিধায়ক আছিল।
