বিগত ৪ জুনত বাংগালুৰুৰ এম চিন্নাস্বামী ষ্টেডিয়ামৰ বাহিৰত হোৱা পদপিষ্টৰ ঘটনা সন্দৰ্ভত এক ডাঙৰ তথ্য পোহৰলৈ আহিছে। ১১জন লোকে প্ৰাণ হেৰুওৱা পদপিষ্টৰ ঘটনাটোৰ বাবে কৰ্ণাটক চৰকাৰে আই পি এলৰ ফ্ৰেঞ্চাইজি আৰ চি বিক দোষাৰোপ কৰিছে।
কৰ্ণাটক চৰকাৰে উচ্চ ন্যায়ালয়ত দাখিল কৰা প্ৰতিবেদনত স্পষ্টভাৱে উল্লেখ কৰিছে যে আৰ চি বিয়ে একপক্ষীয়ভাৱে ছ’চিয়েল মিডিয়াৰ জৰিয়তে ক্ৰিকেট অনুৰাগীসকলক প্ৰথমবাৰৰ বাবে আই পি এলৰ খিতাপ দখলৰ বিজয় উৎসৱত অংশ ল’বলৈ আহ্বান জনাইছিল।
উচ্চ ন্যায়ালয়ত দাখিল কৰা প্ৰতিবেদনত এইটো কথাও উল্লেখ আছে যে আৰ চি বিয়ে চিন্নাস্বামী ষ্টেডিয়ামত প্ৰৱেশ বিনামূলীয়া কৰাৰ ঘোষণা কৰিছিল, যাৰ পৰিণামস্বৰূপে ষ্টেডিয়ামৰ বাহিৰত অভাৱনীয় পৰিৱেশৰ সৃষ্টি হৈছিল।
আটাইতকৈ চাঞ্চল্যকৰ কথাটো হ’ল যে এই প্ৰতিবেদনত উল্লেখ আছে তাৰকা ক্ৰিকেটাৰ বিৰাট কোহলীৰ নাম। প্ৰতিবেদন অনুসৰি, আৰ চি বিয়ে বিৰাট কোহলীৰ এটা ভিডিঅ’ প’ষ্ট কৰি অনুৰাগীসকলক বিজয় উৎসৱত ভাগ ল’বৰ বাবে আহ্বান জনাইছিল। যাৰ পৰিণামস্বৰূপে ষ্টেডিয়ামৰ বাহিৰত অভাৱনীয় পৰিস্থিতিৰ উদ্ভৱ হৈছিল।
ইফালে এই ঘটনা সন্দৰ্ভত কৰ্ণাটক চৰকাৰৰ তৰফৰ পৰা কোৱা হয় যে বিনামূলীয়া পাছ বিতৰণৰ তথ্য আৰ চি বিয়ে স্থানীয় কৰ্তৃপক্ষক অৱগত কৰা নাছিল। আনহাতে কৰ্ণাটকৰ মন্ত্ৰী দীনেশ গুণ্ডু ৰাৱে আজি কয় যে চৰকাৰে আৰোপ-প্ৰত্যাৰোপৰ খেল খেলা নাই। দোষীসকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলিও তেওঁ উল্লেখ কৰে।
