আমেৰিকাৰ মহাকাশ সংস্থা নেশ্যনেল এৰ’নটিক্স এণ্ড স্পেচ এডমিনিষ্ট্ৰেচন (নাছা)ৰ ৩,৮৭০ কৰ্মচাৰীয়ে চাকৰি হেৰুৱাব। এইসকল কৰ্মচাৰীয়ে স্বেচ্ছামূলক পদত্যাগ কাৰ্যসূচীৰ অধীনত পদত্যাগ কৰিবলৈ ওলাইছে।
আমেৰিকাৰ ৰাষ্ট্ৰপতি ড’নাল্ড ট্ৰাম্পৰ প্ৰশাসনে বাজেট কৰ্তনৰ বাবে কৰ্মচাৰীৰ সংখ্যা হ্ৰাস কৰাৰ কাৰ্যসূচী আৰম্ভ কৰিছে। ইয়াৰ অধীনত কৰ্মচাৰীসকলক নাছাৰ পৰা বৰ্খাস্ত কৰাৰ পৰিৱৰ্তে নিজাববীয়াকৈ পদত্যাগ কৰিবলৈ কোৱা হৈছে। ট্ৰাম্প প্ৰশাসনৰ ফেডাৰেল কৰ্মশক্তি হ্ৰাস কৰাৰ লক্ষ্য মানি চলিবলৈ মহাকাশ সংস্থা নাছাৰ বিষয়াসকলে চাকৰিৰ পৰা বৰ্খাস্তৰ পৰা হাত সাৰিবলৈ পদত্যাগ কৰাৰ পথ গ্ৰহণ কৰিছে।
বৰ্তমান নাছাৰ পৰা ৩,৮৭০ কৰ্মচাৰীয়ে পদত্যাগ কৰিছে। অৱশ্যে নাছাই শুকুৰবাৰে দিয়া বিবৃতিত উল্লেখ কৰিছে যে আবেদনসমূহ পুনৰীক্ষণ কৰাৰ পিছত এই সংখ্যা সলনি হ’ব পাৰে। নাছাই ২০২৫ চনত কৰ্মচাৰীসকলক চাকৰি এৰিবলৈ দুটা পৃথক সুযোগ দিছে। দুয়োটা পদত্যাগ কাৰ্যসূচী আৰু প্ৰায় ৫০০ লোকে সাধাৰণভাৱে চাকৰি এৰি যোৱাৰ পিছত নাছাত প্ৰায় ১৪ হাজাৰ কৰ্মচাৰী থাকিব।
