সোমবাৰৰ পৰাই নিৰুদিষ্ট হৈ আছে ৰাজ্যৰ বিশিষ্ট সংগীত পৰিচালক ৰমেন বৰুৱা। বৰ্তমানলৈ কোনো ধৰণৰ সন্ধান লাভ কৰা নাই ৰমেন বৰুৱাৰ। ইফালে, পৰিয়ালৰ লোকে ৰমেন বৰুৱাক বিচাৰি কৰিছে চলাথ। উদ্ধাৰকাৰী দলে বিশিষ্ট সংগীত পৰিচালকগৰাকীক বিচাৰি চলাথ কৰিছে। ঘটনা সন্দৰ্ভত পৰিয়ালৰ লোকে আৰক্ষী থানাত ৰুজু কৰিছে গোচৰ।
আৰক্ষীয়ে জনোৱা অনুসৰি, সোমবাৰে পুৱা ১০ বজাত গুৱাহাটী উচ্চ ন্যায়ালয়ৰ সন্মুখত শেষবাৰৰ বাবে দেখা গৈছিল ৰমেন বৰুৱাক। চিচি টিভিৰ ফুটেজত দেখা পোৱা গৈছিল ৰমেন বৰুৱাক।
ইফালে, মোবাইলৰ শেষ লোকেচন দেখা পোৱা গৈছিল উচ্চ ন্যায়ালয়ৰ সমীপৰ ব্ৰহ্মপুত্ৰৰ পাৰত। আৰক্ষীয়ে সেই তথ্যৰ ভিত্তিতে অভিযান আৰম্ভ কৰিছে।
আনহাতে, SDRF-NDRF বাহিনীয়ে মহাবাহুৰ বুকুতো আৰম্ভ কৰিছে অভিযান।
জানিব পৰা মতে, সোমবাৰে নিশা আৰক্ষীয়ে ৰমেন বৰুৱাৰ জোতাৰ খোজ পাইছিল ব্ৰহ্মপুত্ৰৰ পাৰৰ বালিত। যাৰবাবে সকলোৱে ৰমেন বৰুৱা মহাবাহুৰ বুকুত নিখোজ হোৱা বুলি সন্দেহ প্ৰকাশ কৰিছে।
ইফালে, বিশিষ্ট সংগীত পৰিচালকগৰাকীক বিচাৰি যুৱ প্ৰজন্মৰ হাৰ্টথ্ৰব জুবিন গাৰ্গেও নিজা প্ৰচেষ্টাত অব্যাহত ৰাখিছে। মহানগৰীৰ কেইবাটাও স্থানত অভিযান চলাই শিল্পী জুবিন গাৰ্গে। লাচিত ঘাট, কামাখ্যা মন্দিৰ, শুক্লেশ্বৰ, ভূতনাথ, উজান বজাৰত অভিযান চলাই জুবিন গাৰ্গে।
উল্লেখ্য যে, ৰমেন বৰুৱাৰ অৱদান অসমীয়া সংগীত জগতৰ বাবে উজ্বল নক্ষত্ৰৰ দৰে। অসমীয়া চলচ্চিত্ৰৰ এগৰাকী সংগীত পৰিচালক আৰু কণ্ঠশিল্পী হিচাপে ৰমেন বৰুৱাৰ নাম অনবৈদ্য। ১৯ বছৰ বয়সত তেখেতে জেষ্ঠ্য ভাতৃ ব্ৰজেন বৰুৱাৰ সৈতে যুটীয়াভাবে ১৯৫৯ত মুক্তি পোৱা নিপ বৰুৱা পৰিচালিত ছবি ‘আমাৰ ঘৰ’ বোলছবিখনত সংগীত পৰিচালনা কৰে। ইয়াৰ পিছতে ১৯৬৯ চনত ৰমেন বৰুৱাই নিজৰ প্ৰচেষ্টাত ‘ডক্তৰ বেজবৰুৱা’ নামৰ ছবিখনত সংগীত পৰিচালনা কৰে।
