নেপালত ভয়ংকৰ বিমান দুৰ্ঘটনা সংঘটিত হৈছে। কাঠমাণ্ডুৰ ত্ৰিভূৱন আন্তঃৰাষ্ট্ৰীয় বিমান বন্দৰৰ পৰা সূৰ্য এয়াৰ লাইনছৰ এখন বিমান উৰণৰ কিছু সময়ত পিছতে দুৰ্ঘটনাত পতিত হয়। বৰ্তমানলৈ ১৮ জন লোকৰ মৃত্যু হৈছে বিমান দুৰ্ঘটনাত।
ইফালে, সংকটজনক অৱস্থাত পাইলটজনক উদ্ধাৰ কৰি চিকিৎসালয়ত ভৰ্তি কৰোৱা হৈছে।
প্ৰাৰম্ভিক তথ্য অনুসৰি, প্ৰতিকূল বতৰৰ বাবে সংঘটিত হৈছে এই ঘটনা। উৰণৰ কিছু সময় পিছতে জ্বলি উঠে যাত্ৰীবাহী বিমানখন। দুৰ্ঘটনাৰ পিছতে ততাতৈয়াকৈ আৰম্ভ হয় উদ্ধাৰ অভিযান। বিমান চালকৰ লগতে কেইবাজনকো উদ্ধাৰ কৰা হৈছে।
নেপাল অসামৰিক বিমান পৰিবহন কৰ্তৃপক্ষৰ এক বিবৃতি অনুসৰি, বিমানখন ত্ৰিভুৱন আন্তঃৰাষ্ট্ৰীয় বিমানবন্দৰৰ পৰা উৰা মৰাৰ কেইমিনিটমান পিছত স্থানীয় সময় অনুসৰি প্ৰায় ১১:১৫ বজাত ঘটনাটো সংঘটিত হয়।
বিবৃতিটোত কোৱা হৈছিল যে, বিমানখন উৰণৰ কিছু সময়ত পিছতে সোঁফালে ঘূৰিছিল আৰু ৰানৱেৰ পূব ফালে দুৰ্ঘটনাগ্ৰস্ত হৈছিল।
উল্লেখ্য যে, নেপালত পূৰ্বতেও সংঘটিত হৈছিল বিমান দুৰ্ঘটনা। ২০২৩ চনৰ জানুৱাৰীত নেপালত বিমান দুৰ্ঘটনা সংঘটিত হৈছিল। য’ত ৭২ জন লোকৰ মৃত্যু হৈছিল।
