ভাৰতৰ মনোৰঞ্জন জগতৰ জনপ্ৰিয় কমেডিয়ান কপিল শৰ্মাৰ কানাডাস্থিত কেফেত পুনৰ অস্ত্ৰধাৰী দুৰ্বৃত্তই গুলীচালনা কৰাৰ খবৰ লাভ কৰা গৈছে। এই গুলীচালনাৰ দায়িত্ব লৈছে গোল্ডি ধিলন নামৰ এজন গেংষ্টাৰে।
সম্প্ৰতি নিৰাপত্তা সংস্থা আৰু মুম্বাই আৰক্ষীয়ে এই খবৰৰ সত্যাসত্য নিৰূপণ কৰি আছে। এতিয়ালৈকে গুলীচালনাত কোনো লোক হতাহত হোৱাৰ খবৰ লাভ কৰা নাই।
এই ঘটনাৰ ভিডিঅ’ ছ’চিয়েল মিডিয়াত ভাইৰেল হৈ পৰিছে, য’ত গাড়ীত বহি থকা একাংশ লোকে কেফেখনৰ ফালে গুলীচালনা কৰা দেখা গৈছে। এই ভিডিঅ’টো ৯ ছেকেণ্ডৰ, য’ত ১২টাতকৈ অধিক গুলী চলোৱা হৈছিল।
স্থানীয় আৰক্ষীয়ে এই সন্দৰ্ভত তদন্ত আৰম্ভ কৰিছে। গোল্ডি ধিলনে নিজকে লৰেন্স বিষ্ণোই গেঙৰ সদস্য বুলি কয়।
ৰাষ্ট্ৰীয় সংবাদ মাধ্যমত প্ৰকাশ পোৱা বাতৰি অনুসৰি এই গেংটোৱে কয় যে যদিহে কমেডিয়ান কপিল শৰ্মাই আমাৰ দাবী মানি নলয় তেন্তে তেওঁৰ বিৰুদ্ধে পৰৱৰ্তী পৰ্যায়ত মুম্বাইত ব্যৱস্থা গ্ৰহণ কৰিম।
উল্লেখ্য যে, কানাডাস্থিত কপিল শৰ্মাৰ এই কেফেখনত এইটোৱে প্ৰথম আক্ৰমণ নহয়। ইয়াৰ পূৰ্বেও অৰ্থাত বিগত মাহৰ ১০ জুলাইত শৰ্মা মালিকানাধীন কেফেখনত অস্ত্ৰধাৰী দুৰ্বৃত্তই আক্ৰমণ সংঘটিত কৰিছিল।
