গাজাৰ পৰিস্থিতি দিনক দিনে অচল হৈ গৈ আছে। ইতিমধ্যে ধ্বংসপ্ৰাপ্ত এই অঞ্চলটো সম্পূৰ্ণৰূপে দখল কৰাৰ প্ৰস্তুতি আৰম্ভ কৰিছে ইজৰাইলে।
ইজৰাইলৰ নিৰাপত্তা মন্ত্ৰীসভাই এই পৰিকল্পনাত অনুমোদন জনাইছে যদিও এই সিদ্ধান্তই সমগ্ৰ বিশ্বতে প্ৰতিবাদৰ ঢৌৰ সৃষ্টি কৰিছে। ইউৰোপীয় দেশ, আৰব বিশ্ব আৰু ৰাষ্ট্ৰসংঘই এই পদক্ষেপক লৈ গুৰুতৰ উদ্বেগ প্ৰকাশ কৰাৰ বিপৰীতে ইজৰাইলৰ বিত্তমন্ত্ৰীয়ে এই পদক্ষেপ বাতিল কৰাৰ দাবী জনাইছে।
১০ আগষ্টত দক্ষিণ ইজৰাইলৰ গাজা সীমান্তৰ পৰা লোৱা ছবিসমূহত টেংক, সশস্ত্ৰ বাহন আৰু বৃহৎ সংখ্যক সৈনিক নিয়োগ কৰাটো স্পষ্টকৈ দেখা গৈছে। নিৰাপত্তা মন্ত্ৰীসভাৰ এই সিদ্ধান্তৰ পিছত ইজৰাইলৰ সেনাই আৰু আক্ৰমণত সীমাবদ্ধ নাথাকিব, বৰঞ্চ গাজা চহৰৰ ওপৰত প্ৰত্যক্ষ নিয়ন্ত্ৰণ স্থাপনৰ দিশত আগবাঢ়িছে বুলি ইংগিত পোৱা গৈছে।
তথ্য অনুসৰি, বৰ্তমানলৈকে ৬০ হাজাৰতকৈ অধিক লোকৰ মৃত্যু হৈছে, লাখ লাখ লোক আহত হৈছে। এক বৃহৎ জনসংখ্যাই অনাহাৰৰ সীমাত উপনীত হৈছে। ইজৰাইলৰ এই পদক্ষেপৰ বিৰুদ্ধে আৰব দেশৰ লগতে ইউৰোপ, আফ্ৰিকা আৰু লেটিন আমেৰিকাতো প্ৰতিবাদ চলি আছে। তুৰস্কৰ ইস্তানবুলত ৰাজপথলৈ ওলাই আহিল হাজাৰ হাজাৰ লোক।
