স্বাধীনতা দিৱসৰ দিনটোতেই ছত্তীশগড়ত সংঘটিত হৈছে এক ভয়ংকৰ পথ দুৰ্ঘটনা। এই দুৰ্ঘটনাটোত ৬ গৰাকী লোকৰ মৃত্যু হোৱাৰ লগতে এজন লোক গুৰুতৰভাৱে আহত হয়। আৰক্ষীয়ে প্ৰদান কৰে এই তথ্য।
আৰক্ষী বিষয়াই জানিব দিয়া অনুসৰি ৰাজনান্দগাঁও জিলাৰ বাগনদী থানাৰ অন্তৰ্গত চিৰচাৰী গাঁৱৰ সমীপত এখন ট্ৰাক আৰু চাৰিচকীয়া বাহনৰ মাজত হোৱা প্ৰচণ্ড খুন্দাত এই কৰুণ ঘটনাটো সংঘটিত হয়।
দুৰ্ঘটনাটো ইমানেই ভয়ংকৰ আছিল যে চাৰিচকীয়া বাহনখনত থকা ৬ গৰাকী লোকৰ থিতাতে মৃত্যু হোৱাৰ লগতে আন এজন গুৰুতৰভাৱে আহত হয়।
আৰক্ষীয়ে লাভ কৰা তথ্য অনুসৰি, মধ্য প্ৰদেশৰ ইন্দোৰ নিবাসী সাতগৰাকী লোকে এখন চাৰিচকীয়া বাহনেৰে উজ্জয়িনস্থিত মহাকাল মন্দিৰ দৰ্শন কৰি ওড়িশাৰ পুৰীস্থিত জগন্নাথ মন্দিৰ দৰ্শন কৰিব গৈ থকা সময়তে এই ভয়ংকৰ দুৰ্ঘটনাটো সংঘটিত হয়।
আজি পুৱা প্ৰায় ৫ বজাত ৰাজনান্দগাঁৱৰ চিৰচাৰী গাঁৱৰ সমীপতে চালকজনৰ টোপনি অহাত গাড়ীখন নিয়ন্ত্ৰণহীন হৈ পথৰ সিপাৰে থকা এখন ট্ৰাকৰ লগত খুন্দা মাৰে।
এই ঘটনাৰ পিছতে আৰক্ষীয়ে নিজাববীয়াকৈ গোচৰ ৰুজু কৰি তদন্ত আৰম্ভ কৰিছে।
