নাগালেণ্ডৰ ৰাজ্যপাল লা গনেশনৰ দেহাৱসান। বিগত কিছুদিন ধৰি চিকিৎসালয়ত চিকিৎসাধীন হৈ আছিল লা গণেশন। শুকুৰবাৰে ৰাজভৱনৰ তৰফৰ পৰা তেওঁৰ মৃত্যুৰ কথা নিশ্চিত কৰিছে।
ৰাজভৱনৰ এগৰাকী বিষয়াই জনোৱা মতে, চেন্নাইৰ এখন চিকিৎসালয়ত চিকিৎসাৰ সময়তে নাগালেণ্ডৰ ৰাজ্যপাল লা গণেশনৰ মৃত্যু হয়। আজি ৮০ বছৰ বয়সত মৃত্যু হয় লা গণেশনৰ।
প্ৰাপ্ত তথ্য অনুসৰি যোৱা ৮ আগষ্টত চেন্নাইস্থিত নিজৰ বাসগৃহত পৰি যোৱাৰ ফলত মূৰত গুৰুতৰভাৱে আঘাতপ্ৰাপ্ত হয়। ইয়াৰ পিছৰ পৰাই তেওঁ চেন্নাইৰ এপ’ল’ হাস্পতালত চিকিৎসাধীন হৈ আছিল।
নাগালেণ্ডৰ ৰাজ্যপাল লা গণেশনৰ মৃত্যুত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে। প্ৰধানমন্ত্ৰী মোদীয়ে সামাজিক মাধ্যম এক্সযোগে লিখিছে, ‘নাগালেণ্ডৰ ৰাজ্যপাল লা গণেশনৰ মৃত্যুত দু:খিত। সেৱা আৰু জাতি নিৰ্মাণৰ বাবে নিজৰ জীৱন উৎসৰ্গা কৰা এজন নিষ্ঠাবান জাতীয়তাবাদী হিচাপে তেওঁক স্মৰণ কৰা হ’ব। তেখেতৰ পৰিয়াল আৰু অনুৰাগী সকলৰ প্ৰতি মোৰ সমবেদনা জ্ঞাপন কৰিছো। ওম শান্তি।’
লা গণেশনৰ সম্পূৰ্ণ নাম লা গণেশন আয়াৰ। ১৯৪৫ চনৰ ১৬ ফেব্ৰুৱাৰীত জন্মগ্ৰহণ কৰা গণেশনে ২০২৩ চনৰ ২০ ফেব্ৰুৱাৰীত নাগালেণ্ডৰ ১৯ সংখ্যক ৰাজ্যপালৰ দায়িত্ব গ্ৰহণ কৰে।
নাগালেণ্ডৰ পূৰ্বে ২০২১ চনৰ ২৭ আগষ্টৰ পৰা ২০২৩ চনৰ ১৯ ফেব্ৰুৱাৰীলৈকে মণিপুৰৰ আৰু ২০২২ চনৰ ২৮ জুলাইৰ পৰা ২০২২ চনৰ পৰা ১৭ নৱেম্বৰলৈকে পশ্চিম বংগৰ ৰাজ্যপাল (অতিৰিক্ত দায়িত্ব) হিচাপে সেৱা আগবঢ়াইছিল।
