কৃষ্ণ জন্মাষ্টমী উপলক্ষে ঝাৰখণ্ডৰ ৰাঞ্চিৰ এলবাৰ্ট এক্কা চ’কৰ সমীপত দহী হাণ্ডী ভংগ প্ৰতিযোগিতাৰ আয়োজন কৰা হয়। এই প্ৰতিযোগিতা চাবলৈ হাজাৰ হাজাৰ লোক সমবেত হৈছিল।
এই সময়ত দহী হাণ্ডী ফটো প্ৰতিযোগিতাৰ সমান্তৰালকৈ সাংস্কৃতিক নৃত্য আৰু সংগীতৰ এক অনুষ্ঠানো চলি আছিল। অনুষ্ঠানত মুখ্য অতিথি হিচাপে ঝাৰখণ্ডৰ ৰাজ্যপাল সন্তোষ গংগৱাৰ, কেন্দ্ৰীয় প্ৰতিৰক্ষা ৰাজ্যিক মন্ত্ৰী সঞ্জয় ছেঠ, ৰাঞ্চিৰ বিধায়ক চি পি সিংকে ধৰি বহু লোকে মঞ্চত উপস্থিত থাকে। ইফালে অনুষ্ঠানত বোৰ্খা পৰিধান কৰা এজন লোকক দেখা যায়। এনে পৰিস্থিতিত সন্দেহত তেওঁৰ বোৰ্খা আঁতৰাই দিয়া হয় আৰু বোৰ্খাৰ ভিতৰত যে পুৰুষ আছে, সেয়া ওলাই পৰে।
বোৰ্খা পিন্ধা মানুহজনক দেখি সকলোৱে আচৰিত হৈ পৰে। ৰাঁচীৰ সুখদেৱ নগৰ থানা এলেকাৰ অন্তৰ্গত কিশোৰগঞ্জৰ বাসিন্দা প্ৰমোদ ছোনী বুলি জানিব পৰা গৈছে। কৃষ্ণ জন্মাষ্টমী উৎসৱত উপস্থিত হোৱা লোকসকলে তেওঁক ধৰি কোটৱালি থানাৰ আৰক্ষীক এই বিষয়ে অৱগত কৰি প্ৰমোদক আৰক্ষীৰ হাতত গতাই দিয়ে। কৃষ্ণ জন্মাষ্টমী উৎসৱত মহিলাৰ দৰে বোৰ্খা পিন্ধি ঘূৰি ফুৰা প্ৰমোদ ছোনীক জিম্মাত লৈ সমগ্ৰ বিষয়টোৰ তদন্ত আৰম্ভ কৰিছে কোতৱালি আৰক্ষী থানাই।
অৱশ্যে বৰ্খা পিন্ধি প্ৰমোদ ছোনীয়ে অনুষ্ঠানটোত কি কৰিবলৈ আহিছিল সেয়া এতিয়াও জানিব পৰা হোৱা নাই। প্ৰমোদ ছোনী মূলতঃ গুমলা জিলাৰ পালকোট থানা এলেকাৰ বাসিন্দা। অৱশ্যে বৰ্তমান তেওঁ ৰাঁচীৰ সুখদেৱ নগৰ থানা এলেকাৰ অন্তৰ্গত কিশোৰগঞ্জ অঞ্চলত বাস কৰিছিল।
আৰক্ষীয়ে অভিযুক্ত প্ৰমোদক জিম্মাত লৈ কিয় বোৰ্খা পিন্ধি অনুষ্ঠানত ঘূৰি ফুৰিছিল সেই সন্দৰ্ভত জেৰা কৰি আছে। একে সময়তে মুছলমান সমাজৰ সৈতে জড়িত লোকসকলে এই বিষয়ত অসন্তুষ্টি প্ৰকাশ কৰি কয় যে, এয়া ৰাঁচীৰ পাৰস্পৰিক সম্প্ৰীতি বিনষ্ট কৰাৰ প্ৰয়াস। বোৰ্খাত লুকাই থকা ব্যক্তিজনে যদি কোনো ভুল কাম কৰিলেহেঁতেন তেন্তে ই মুছলমান সম্প্ৰদায়ৰ মানুহক বদনাম কৰিলেহেঁতেন। এতিয়া ৰাইজে অভিযুক্তৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে।
