মঙলদৈ পিপৰাদোকানত সংঘটিত হয় এক চাঞ্চল্যকৰ ঘটনা। হঠাৎ প্ৰায় সকলোৱে অচেতন হৈ পৰে এটি বিহুদলৰ সকলো সদস্য।
মঙলদৈৰ দিঘিৰপাৰত বিহু পৰিবেশন কৰি উভতাৰ পথত পিপৰাদোকানত পুৱতি নিশা সংঘটিত হয় এই ঘটনা। পাঠশালাৰ পৰি হৰেশ্বৰ নামৰ বিহু দলটিৰ প্ৰায় সকলো সদস্য হঠাৎ অচেতন হৈ পৰে। পুৱা অচেতন অৱস্থাত থকা বিহু দলটিৰ ঢুলীয়া, নাচনী সকলোকে মঙলদৈ অসামৰিক চিকিৎসালয়ত ভৰ্তি কৰোৱা হয়। ইয়াৰ পিছতে ততালিকে চিকিৎসা আৰম্ভ কৰে চিকিৎসকে।
মঙলদৈ অসামৰিক চিকিৎসালয়ত ভৰ্তি কৰোৱা বিহু দলটিৰ সদস্যসকল হৈছে- সুচিত্ৰা দাস,পাপৰি দাস, হেমন্ত শৰ্মা, ৰাহুল ৰয়, নয়নজ্যোতি দাস, চিমা বড়ো, ৰঞ্জিত হালৈ, সঞ্জয় মেধী, ইছা গোস্বামী, ভাৰ্গৱ ডেকা আৰু দ্বীপজোতি ৰয়। লগতে তেওঁলোকৰ বাহনখনো হঠাৎ অচল হৈ পৰে।
উল্লেখ্য যে, ৬ নম্বৰখন বিহু পৰিবেশন কৰি উভতাৰ পথত দলটিৰ সৈতে এই ঘটনা সংঘটিত হয়। অৱশ্যে কি কাৰণত এনে ঘটনা সংঘটিত হ’ল সেইয়া বৰ্তমানেও জানিব পৰা নাই। তাৎপৰ্যপূৰ্ণভাবে বিহু দলটিৰ কোনো এজন সদস্যইও এই ক্ষেত্ৰত কোনো তথ্য প্ৰকাশ কৰিব বিচৰা নাই।যাৰবাবে এই বিষয়টো অধিক জটিল হৈ পৰিছে।
ইতিমধ্যে ঘটনাস্থলীত উপস্থিত হৈছে মঙলদৈ আৰক্ষী। চিকিৎসাৰ পিছতহে ঘটনাৰ প্ৰকৃত সত্য পোহৰলৈ আহিব।
