অসমত স্থাপন হ’ব উচ্চ শিক্ষাৰ শীৰ্ষ প্ৰতিষ্ঠান ইণ্ডিয়ান ইনষ্টিটিউট অফ মেনেজমেণ্ট (IIM)। এই উচ্চ শিক্ষাৰ প্ৰতিষ্ঠানখনৰ বাবে দেশৰ প্ৰধানমন্ত্ৰী নৰেন্দ্ৰ মোদীয়ে অসমবাসীক অভিনন্দন জ্ঞাপন কৰিছে।
সামাজিক মাধ্যমক এক্সযোগে এটা প’ষ্ট কৰি প্ৰধানমন্ত্ৰী নৰেন্দ্ৰ মোদীয়ে অসমীয়াতে লিখিছে, ‘অসমবাসীক অভিনন্দন জনাইছো! ৰাজ্যখনত আইআইএম স্থাপনে শিক্ষাৰ আন্তঃগাঁথনি শক্তিশালী কৰাৰ লগতে দেশৰ বিভিন্ন প্ৰান্তৰ ছাত্ৰ-ছাত্ৰী আৰু গৱেষকক আকৰ্ষণ কৰিব।’
ইফালে দেশৰ শিক্ষা মন্ত্ৰী ধৰ্মেন্দ্ৰ প্ৰধানে সামাজিক মাধ্যমযোগে কয় যে দেশৰ আগশাৰীৰ শৈক্ষিক কেন্দ্ৰ হিচাপে অসমে এক ঐতিহাসিক মাইলৰ খুঁটিত উপনীত হ’ব।
তেওঁ লগতে লিখিছে, ‘সংসদত দ্যা ইণ্ডিয়ান ইনষ্টিটিউট অফ মেনেজমেণ্ট (সংশোধনী) বিধেয়ক, ২০২৫ গৃহীত হোৱাৰৰ লগে লগে অসমে গুৱাহাটীত প্ৰথমখন আইআইএম লাভ কৰিলে।
ইফালে নৰেন্দ্ৰ মোদীৰ নেতৃত্বত কেন্দ্ৰীয় চৰকাৰ, অসম চৰকাৰ আৰু আলফাৰ মাজত হোৱা ত্ৰিপাক্ষিক চুক্তি অনুসৰি গুৱাহাটীয়ে প্ৰথমখন আইএমএম লাভ কৰাৰ বাবে কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানে অসমৰ মুখ্যমন্ত্ৰী ড০ হিমন্ত বিশ্ব শৰ্মাৰ লগতে প্ৰতিগৰাকী লোককে অভিনন্দন জ্ঞাপন কৰে।
