২০২৭ চনৰ এদিনীয়া বিশ্বকাপৰ স্থানসমূহ ঘোষণা কৰা হৈছে। ক্ৰিকেটৰ আটাইতকৈ সৰ্ববৃহত প্ৰতিযোগিতাখন দক্ষিণ আফ্ৰিকা, জিম্বাবুৱে আৰু নামিবিয়াত অনুষ্ঠিত হ’ব। প্ৰতিযোগিতাখনত মুঠ ৫৪খন মেচ অনুষ্ঠিত হ’ব, ইয়াৰে ৪৪খন মেচ দক্ষিণ আফ্ৰিকাই আয়োজন কৰাৰ বিপৰীতে বাকী ১০খন মেচ জিম্বাবুৱে আৰু নামিবিয়াত অনুষ্ঠিত হ’ব।
২০২৭ চনৰ অক্টোবৰ-নৱেম্বৰ মাহত অনুষ্ঠিত হ’ব এদিনীয়া বিশ্বকাপ।
২০২৭ চনৰ এদিনীয়া বিশ্বকাপ আয়োজন কৰিবলৈ জোহান্সবাৰ্গ, প্ৰিট’ৰিয়া, কেপটাউন, ডাৰবান, জিকেবাৰা, ব্ল’মফণ্টেইন, ইষ্ট লণ্ডন আৰু পাৰ্লক নিৰ্বাচিত কৰা হৈছে। স্থান ঘোষণাৰ সমান্তৰালকৈ বিশ্বকাপ প্ৰতিযোগিতাৰ বাবে স্থানীয় আয়োজক সমিতিৰ ব’ৰ্ডো গঠন কৰা হৈছে। এই কমিটীৰ নেতৃত্বত থাকিব দক্ষিণ আফ্ৰিকাৰ প্ৰাক্তন কেবিনেট মন্ত্ৰী ট্ৰেভৰ মেনুৱেল।
২০০৩ চনৰ পিছত এইবাৰ দ্বিতীয়বাৰৰ বাবে দক্ষিণ আফ্ৰিকা আৰু জিম্বাবুৱেৰ সহযোগত এদিনীয়া বিশ্বকাপ অনুষ্ঠিত হ’ব। ইফালে প্ৰথমবাৰৰ বাবে বিশ্বকাপ প্ৰতিযোগিতাৰ আয়োজক দেশ হিচাপে নিৰ্বাচিত হৈছে নামিবিয়া।
২০২৭ চনৰ বিশ্বকাপত মুঠ ১৪টা দলে অংশগ্ৰহণ কৰিব। ইয়াৰ বাবে সাতটাকৈ দলৰ দুটা গ্ৰুপ গঠন কৰা হ’ব। দুয়োটা গ্ৰুপৰ শীৰ্ষ ৩ খন দেশে ছুপাৰ-৬ পৰ্যায়ত প্ৰৱেশ কৰিব। ২০০৩ চনতো একেধৰণৰ ফৰ্মেট গ্ৰহণ কৰা হৈছিল।
আয়োজক দল হোৱাৰ বাবে দক্ষিণ আফ্ৰিকা আৰু জিম্বাবুৱেই বিশ্বকাপত প্ৰত্যক্ষ প্ৰৱেশ লাভ কৰিছে যদিও তৃতীয়খন আয়োজক নামিবিয়াৰ আইচিচিৰ সদস্যপদ নাই, সেয়ে কোৱালিফিকেশ্যনৰ জৰিয়তে বিশ্বকাপত স্থান নিশ্চিত কৰিব লাগিব।
