উত্তৰ প্ৰদেশৰ পিলিভিত জিলাত সংঘটিত হৈছে এক মৰ্মান্তিক দুৰ্ঘটনা। শনিবাৰে এখন তীব্ৰবেগী ফৰ্চুনাৰ বাহন আৰু যাত্ৰীবাহী টেম্পোৰ মাজত হোৱা ভয়ংকৰ সংঘৰ্ষত ৫ জন লোকৰ মৃত্যু হোৱাৰ বিপৰীতে আন কেইবাজনো লোক আহত হোৱাৰ খবৰ পোৱা গৈছে।
সম্প্ৰতি আহতসকলৰ চিকিৎসা চলি আছে, আনহাতে মৃত লোকসকলক মৃতদেহ মৰণোত্তৰ পৰীক্ষাৰ বাবে স্থানীয় চৰকাৰী মেডিকেল কলেজলৈ প্ৰেৰণ কৰা হৈছে।
দৰাচলতে শনিবাৰে পিলিভিতৰ ঘাইপথত এখন তীব্ৰবেগী ‘ফৰ্চুনাৰ’ গাড়ী আৰু টেম্পোৰ মাজত মুখামুখি সংঘৰ্ষ হয়। এই দুৰ্ঘটনাত এটি শিশুসহ পাঁচজন লোকৰ মৃত্যু হয়। ঘটনা সন্দৰ্ভত তথ্য প্ৰদান কৰে এজন আৰক্ষী বিষয়াই।
আৰক্ষীয়ে জনোৱা মতে, দুৰ্ঘটনাৰ পিছত টেম্পোখন খাৱৈত বাগৰি পৰে আৰু আন ৫জন লোক গুৰুতৰভাৱে আহত হয়।
জেহানাবাদ আৰক্ষী থানাৰ তথ্য অনুসৰি, জেহানাবাদৰ পৰা যাত্ৰীৰে ভৰা এখন টেম্পো অমৰীয়া অভিমুখে গৈ থকা অৱস্থাত সন্মুখৰ পৰা অহা এখন তীব্ৰবেগী ‘ফৰ্চুনাৰ’ গাড়ীৰ সৈতে মুখামুখি সংঘৰ্ষ হয়।
আৰক্ষীৰ তথ্য অনুসৰি এগৰাকী মহিলা আৰু দুটা শিশুসহ চাৰিজন লোকৰ থিতাতে মৃত্যু হোৱাৰ বিপৰীতে চিকিৎসাৰ সময়ত এজন লোকৰ মৃত্যু হয়।
ইফালে টেম্পোখনত থকা ডেৰ ডজন যাত্ৰীক ততাতৈয়াকৈ জিলা চিকিৎসালয়লৈ লৈ যোৱা হয় যদিও চিকিৎসকে তেওঁলোকৰ অৱস্থা সংকটজনক বুলি ঘোষণা কৰিছে।
