ৰাছিয়া-ইউক্ৰেইন যুদ্ধ সন্দৰ্ভত পুনৰ এক বৃহৎ বক্তব্য আগবঢ়াইছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। এই সংঘাতক “জো বাইডেন আৰু জেলেনস্কিৰ মাজৰ যুদ্ধ” বুলি অভিহিত কৰি তেওঁ স্পষ্টভাৱে কয় যে, যদি ট্ৰাম্প সেইসময়ত ৰাষ্ট্ৰপতি হ’লহেঁতেন, তেন্তে এই যুদ্ধ কেতিয়াও আৰম্ভ নহ’লহেঁতেন।
ট্ৰাম্পে নাটো দেশসমূহৰ কৌশলক লৈ প্ৰশ্ন উত্থাপন কৰি কয় যে, তেওঁলোকৰ জয়ৰ প্ৰতিশ্ৰুতি “১০০%তকৈ বহু কম”।লগতে ৰাছিয়াৰ ওপৰত কঠোৰ নিষেধাজ্ঞা আৰোপ কৰিবলৈ সাজু বুলি সকীয়াই দিয়ে ট্ৰাম্পে। ৰাষ্ট্ৰপতি ড’নাল্ড ট্ৰাম্পে কয় যে, এইটো সম্ভৱ হ’ব তেতিয়াহে যেতিয়া নাটোৰ সকলো দেশেই একেলগে এই পদক্ষেপত একমত হ’ব আৰু ৰাছিয়াৰ পৰা তেল ক্ৰয় কৰাটো সম্পূৰ্ণৰূপে বন্ধ কৰিব।
চীনৰ ওপৰতো ৫০%ৰ পৰা ১০০%লৈকে শুল্ক আৰোপ কৰাৰ দাবী জনাই তেওঁ কয় যে, এই ব্যৱস্থাৰ দ্বাৰা আমেৰিকাক অৰ্থনৈতিকভাৱে সহায় কৰাই নহয়, এই পদক্ষেপে ৰাছিয়া-ইউক্ৰেইন যুদ্ধৰ অন্ত পেলোৱাতো ফলপ্ৰসূ বুলি প্ৰমাণিত হ’ব।
