২৩ ছেপ্তেম্বৰ অৰ্থাত মঙলবাৰে অশ্ৰুশিক্ত নয়নেৰে বিদায় জনালে অসমবাসীৰ আপোন শিল্পী জুবিন গাৰ্গক। সোণাপুৰৰ কমাৰকুছিত ৰাষ্ট্ৰীয় মৰ্যাদাৰে শেষকৃত্য সম্পন্ন হোৱাৰ পিছতে জুবিন গাৰ্গৰ ৰহস্যজনক মৃত্যু সন্দৰ্ভত তদন্ত আৰম্ভ কৰিছে চি আই ডিয়ে।
ৰাজ্যৰ বিভিন্ন থানাত ৰুজু হোৱা গোচৰৰ ভিত্তিত চি আই চিৰ দলে পৃথকে পৃথকে থানাসমূহত উপস্থিত হৈ তদন্ত আৰম্ভ কৰা পৰিলক্ষিত হৈছে।
জুবিন গাৰ্গৰ মৃত্যুৰ প্ৰকৃত কাৰণ উদঘাটনৰ দাবীত ৰাজ্যজুৰি আৰম্ভ হোৱা প্ৰতিবাদৰ মাজতে আজি মুখ্যমন্ত্ৰীয়ে তদন্ত তন্দৰ্ভত এক ডাঙৰ ঘোষণা কৰে।
আজি কিছুসময় পূৰ্বে মুখ্যমন্ত্ৰী ড০ হিমন্ত বিশ্ব শৰ্মাই জুবিন গাৰ্গৰ মৃত্যুৰ তদন্ত সন্দৰ্ভত আৰক্ষী সঞ্চালক প্ৰধান, অতিৰিক্ত আৰক্ষী সঞ্চালক প্ৰধান, চিআইডি, মুখ্য সচিবৰ লগতে আন আন শীৰ্ষ বিষয়াসকলৰ সৈতে এক বৈঠকত মিলিত হৈছিল।
এই বৈঠকৰ সময়তে মুখ্যমন্ত্ৰী শৰ্মাই আৰক্ষী সঞ্চালক প্ৰধানক জুবিনৰ মৃত্যুৰ তদন্ত কৰিবলৈ এছ আই টি গঠন কৰিবলৈ নিৰ্দেশ প্ৰদান কৰিছে। টুইটযোগে এই কথা জনাই মুখ্যমন্ত্ৰী শৰ্মাই।
এই এছ আই টিৰ দলটোত অসম আৰক্ষীৰ সুদক্ষ বিষয়াক অন্তৰ্ভুক্ত কৰিবলৈও নিৰ্দেশ প্ৰদান কৰে মুখ্যমন্ত্ৰী শৰ্মাই।
হিমন্ত বিশ্ব শৰ্মাই এক্সযোগে কৰা প’ষ্টটোত এই আছ আই টিৰ দলটোক তদন্তৰ বাবে পূৰ্ণ স্বাধীনতা প্ৰদান কৰাৰ কথাও উল্লেখ কৰা হৈছে।
