শনিবাৰে ৰাছিয়াৰ সেনা বাহিনীয়ে ইউক্ৰেইনৰ এখন যাত্ৰীবাহী ৰে’লত ভয়ংকৰ আক্ৰমণ সংঘটিত কৰে। এই আক্ৰমণত কেইবাজনো লোক আহত হোৱাৰ খবৰ আহিছে।
ইউক্ৰেইনৰ উত্তৰ ছুমি অঞ্চলৰ এটা ষ্টেচনত যাত্ৰীবাহী ৰে’লত ড্ৰ’ন আক্ৰমণত কেইবা ডজন লোক আহত হোৱা বুলি শনিবাৰে দেশখনৰ শীৰ্ষ বিষয়াসকলে জনায়।
ইউক্ৰেইনৰ ৰাষ্ট্ৰপতি জেলেনস্কিয়ে টেলিগ্ৰামত লিখিছে, ‘ছুমি অঞ্চলৰ শ্ব’ষ্টকাত থকা ৰে’লৱে ষ্টেচনত ৰাছিয়াই ড্ৰ’ন আক্ৰমণ সংঘটিত কৰিছে। কেইবা ডজন যাত্ৰী আৰু ৰে’ল কৰ্মী আহত হৈছে।’
ৰাষ্ট্ৰপতি জেলেনস্কিয়ে লগতে এটা ভিডিঅ’ পোষ্ট কৰিছিল য’ত স্পষ্ট ৰূপত দেখা গৈছিল এখন ক্ষতিগ্ৰস্ত, জ্বলি থকা যাত্ৰীবাহী ৰে’ল।
এই আক্ৰমণ সংঘটিত হোৱা অঞ্চলটোৰ গভৰ্ণৰ ওলেহে কয় যে শ্ব’ষ্টকাৰ পৰা ৰাজধানী কীভ অভিমুখে গৈ থকা যাত্ৰীবাহী ৰে’লখনত এই আক্ৰমণ সংঘটিত হয়। আক্ৰমণৰ পিছতেই ঘটনাস্থলত চিকিৎসক আৰু উদ্ধাৰকাৰী দল উপস্থিত হয়।
