বাংলাদেশৰ আদালতে দিব চূড়ান্ত ৰায়। বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাৰ মৃত্যুদণ্ড দিয়া হ’ব নে ক্ষমা দান দিয়া হ’ব সেই সন্দৰ্ভত ১৭ ৰায় দিব ন্যায়ালয়ে।
শ্বেখ হাছিনাৰ বিৰুদ্ধে দাখিল কৰা মানৱীয়তা উলংঘা কৰা গোচৰৰ শুনানি আজি ঢাকাৰ আন্তঃৰাষ্ট্ৰীয় অপৰাধ ন্যায়াধিকৰণত অনুষ্ঠিত হ’ব। চৰকাৰী অধিবক্তাই শ্বেখ হাছিনাৰ মৃত্যুদণ্ডৰ দাবী কৰিছে। শ্বেখ হাছিনাৰ বিৰুদ্ধে ভাষ্য দিব ৮৪ গৰাকী লোকে।
শ্বেখ হাছিনাৰ বিৰুদ্ধে বহু গুৰুতৰ অভিযোগ উত্থাপিত হৈছে(হত্যা, অপৰাধ প্ৰতিৰোধত ব্যৰ্থ হোৱা, মানৱীয়তা উলংঘা কৰা, ১৪০০ লোকৰ প্ৰাণ লোৱা ইত্যাদি)। যাৰ বাবে শ্বেখ হাছিনাৰ মৃত্যুদণ্ডৰ দাবী উত্থাপন কৰিছে।
অৱশ্যে এই দাবীৰ বিৰুদ্ধে শ্বেখ হাছিনাৰ দল আৱামী লীগেও তীব্ৰ প্ৰতিবাদ সাব্যস্ত কৰিছে। বৃহস্পতিবাৰে পুৱাৰে পৰা সন্ধিয়ালৈ দেশজুৰি লকডাউন ঘোষণা কৰিছে আৱামি লীগে। ইয়াৰ পৰিপ্ৰেক্ষিতত বাংলাদেশত জাৰি কৰা হৈছে হাই এলাৰ্ট। বিমান বন্দৰৰ লগতে বহু গুৰুত্বপূৰ্ণ স্থানত সেনা-আৰক্ষী মোতায়েন কৰা হৈছে। পৰিস্থিতি অধিক বেয়া হোৱাৰ সম্ভাৱনা বিবেচনা কৰি ন্যায়াধিকৰণে সিদ্ধান্তৰ তাৰিখ পিছুৱাই দিব পাৰে বুলিও ধাৰণা কৰা হৈছে।
দৰাচলতে ২০২৪ চনৰ জুলাই মাহত শ্বেখ হাছিনাৰ চৰকাৰৰ বিৰুদ্ধে বাংলাদেশত তীব্ৰ প্ৰতিবাদৰ সৃষ্টি হৈছিল। এই সময়ছোৱাত চৰকাৰে প্ৰতিবাদৰ বিৰুদ্ধে দমনমূলক ব্যৱস্থা গ্ৰহণ কৰে। চৰকাৰৰ বিৰুদ্ধে প্ৰতিবাদকাৰী ছাত্ৰ-ছাত্ৰীক গ্ৰেপ্তাৰ, নিৰ্যাতন, গুলীচালনাৰ অভিযোগ উত্থাপন হোৱাৰ ফলত কেইবাজনো প্ৰতিবাদকাৰীৰ মৃত্যু হয়। ২০২৪ চনৰ ৫ আগষ্টত হাছিনাৰ চৰকাৰ উৎখাত হয়। শ্বেখ হাছিনাই দেশ এৰি পলায়ন কৰি ভাৰতত আশ্ৰয় লয়।
বাংলাদেশৰ বৈদেশিক মন্ত্ৰালয়ে বুধবাৰে ঢাকাত ভাৰতৰ উপ-উচ্চায়ুক্তক চমন কৰি প্ৰাক্তন প্ৰধানমন্ত্ৰী শ্বেখ হাছিনাৰ মূলসুঁতিৰ ভাৰতীয় সংবাদ মাধ্যমৰ সৈতে হোৱা আদান-প্ৰদানক লৈ গুৰুতৰ উদ্বেগ প্ৰকাশ কৰে। সূত্ৰ অনুসৰি, বাংলাদেশৰ বৈদেশিক মন্ত্ৰালয়ে ভাৰতৰ উপ-উচ্চায়ুক্ত পৱন বাধেক চমন কৰি ভাৰত চৰকাৰে প্ৰাক্তন প্ৰধানমন্ত্ৰী শ্বেখ হাছিনাক মূলসুঁতিৰ ভাৰতীয় সংবাদ মাধ্যমৰ সৈতে মত বিনিময় কৰিবলৈ অনুমতি দিয়াক লৈ বাংলাদেশে ভাৰতৰ বিৰুদ্ধে আনুষ্ঠানিকভাৱে উদ্বেগ প্ৰকাশ কৰে।
